काठमाडौं । नक्कली शैक्षिक प्रमाणपत्र बनाएर अमेरिकाको डाइभर्सिटी भिसा (डिभी) प्रक्रिया अघि बढाउने एउटा गिरोहलाई प्रहरीले पक्राउ गरेको छ । काठमाडौं उपत्यका अपराध अनुसन्धान कार्यालयले नक्कली शैक्षिक प्रमाणपत्र बनाउने र प्रयोग गर्ने सात जनालाई पक्राउ गरी कारवाही अघि बढाएको हो ।

तनहुँको म्याग्दे गाउँपालिका ७ घर भएका १९ वर्षीय किरण सिंह ठकुरीले डिभी प्रयोजनका लागि काठमाडौंस्थित अमेरिकी दूतावासमा कक्षा १२ उत्तीर्ण गरेको शैक्षिक प्रमाणपत्र पेस गरेका थिए । दूतावासले उक्त प्रमाणपत्र प्रमाणीकरणका लागि राष्ट्रिय परीक्षा बोर्ड सानोठिमीमा पठाउँदा उक्त कागजात नक्कली भएको पुष्टि भएको थियो ।

बोर्डबाट प्रमाणपत्र नक्कली भएको जानकारी आएपछि प्रहरीले अनुसन्धान सुरु गरेको थियो । अनुसन्धानका क्रममा प्रहरीले नक्कली प्रमाणपत्र प्रयोग गर्ने ठकुरीसहित उक्त प्रमाणपत्र बनाइदिने अन्य व्यक्तिहरूलाई काठमाडौंका विभिन्न स्थानबाट पक्राउ गरेको छ ।

प्रहरीको विशेष टोलीले माघ १५ र १६ गते गरी यो धन्दामा संलग्न सात जनालाई नियन्त्रणमा लिएको हो । पक्राउ पर्नेमा मुख्य आरोपी किरण सिंह ठकुरीसहित पर्वत फलेवासका ४० वर्षीय अनिल शर्मा, काठमाडौं तारकेश्वरका ३४ वर्षीय लक्ष्मण बस्नेत र नुवाकोट ककनीका ४२ वर्षीय केशव फुयाँल छन् ।

त्यस्तै नुवाकोट तादीका ४७ वर्षीय विष्णु पाण्डे, काठमाडौं महानगरपालिका २ की ४३ वर्षीया दीपा लावती र गुल्मीका ५२ वर्षीय शोभाखर खनाल पनि पक्राउ परेका छन् ।

कार्यालयका सूचना अधिकारी एवम् प्रहरी उपरीक्षक रामेश्वर कार्कीका अनुसार पक्राउ परेका सबैलाई लिखत सम्बन्धी कसुरमा आवश्यक अनुसन्धान र कारबाहीका लागि आइतबार जिल्ला प्रहरी परिसर भद्रकाली पठाइएको छ । प्रहरीले नक्कली प्रमाणपत्र बनाउने गिरोहका अन्य सदस्य र सञ्जालबारे पनि थप अनुसन्धान भइरहेको जनाएको छ ।