तीन दिन बिदामा पनि सरकारी अस्पतालमा ओपीडी सेवा सञ्चालन गर्न आग्रह

काठमाडौं । स्वास्थ्य तथा जनसङ्ख्या मन्त्रालयले आजदेखि देशभरका सबै सरकारी अस्पतालमा बहिरङ्ग (ओपीडी) सेवा सञ्चालन गर्न निर्देशन दिएको छ। मन्त्रालयका सहप्रवक्ता डा. समीरकुमार अधिकारीका अनुसार लगातार तीन दिन सार्वजनिक बिदा परेका कारण अस्पतालमा ओपीडी सेवा प्रभावित भई सेवाग्राहीलाई असुविधा हुनसक्ने अवस्था देखिएकाले यस्तो निर्देशन जारी गरिएको हो।

उनले बिदाको अवधिमा पनि नियमित स्वास्थ्य सेवा सुनिश्चित गर्न सबै सरकारी अस्पताललाई आवश्यक व्यवस्था मिलाएर ओपीडी सेवा सञ्चालन गर्न आग्रह गरिएको बताए।

मन्त्रालयले आकस्मिक सेवा जस्तै ओपीडी सेवा पनि निरन्तर सञ्चालन हुँदा बिरामीलाई उपचारमा सहजता हुने विश्वास व्यक्त गरेको छ।