ट्रेकिङ अनुमति अब अनलाइनबाटै, सार्वजनिक बिदामा पनि सेवा

काठमाडौं । अध्यागमन विभागले विदेशी नागरिकका लागि १३ जिल्लाका निषेधित क्षेत्रमा गरिने पदयात्रा अनुमति प्रक्रियामा नयाँ व्यवस्था लागु गरेको छ ।

विभागका अनुसार अब पदयात्रा अनुमतिसम्बन्धी सम्पुर्ण प्रक्रिया आवेदनदेखि स्वीकृतीसम्म अनलाइन प्रणालीमार्फत सञ्चालन हुनेछ । यस व्यवस्थाले सेवा थप छिटो, सहज र सेवाग्राहीमैत्री हुने विश्वास विभागले लिएको छ ।

नयाँ व्यवस्था अनुसार विदेशी नागरिकले नेपाल प्रवेश गर्दा प्राप्त भिसा नम्बर प्रणालीमा अद्यावधिक नभए पनि पदयात्रा अनुमति आवेदन दिन सक्नेछन् । त्यस्तैगरी अब एकजना पदयात्रीलाई समेत पदयात्रालाई समेत पदयात्रा अनुमति उपलब्ध गराइने विभागले जनाएको छ ।

सरकारले साताको दुई दिन सार्वननिक बिदा लागु गरेपनि पदयात्रा अनुमति लिन आउने पर्यटक तथा ट्रेकिङ एजेन्सीलाई ध्यानमा राख्दै विभागले नयाँ कार्यतालिका सार्वजनिक गरेको बताइएको छ ।

अब शनिबारबाहेक अन्य सार्वजनिक बिदाका दिनमा पनि विभागले बिहान ११ बजेदेखि दिउँसो १ बजेसम्म दुई घण्टा पदयात्रा अनुमति सम्बन्धी सेवा उपलब्ध गराउने निर्णय गरेको छ ।

विभागले अधिकांश सेवा अनलाइनमार्फत हुने भएकाले सेवाग्राहीलाई कार्यालयमै उपस्थित हुनुपर्ने बाध्यता नरहेको स्पष्ट पारेको छ । आवश्यक कागजात वा प्राविधिक समस्या परेमा विभागले उपलब्ध गराएको सम्पर्क माध्यमबाट सहयोग लिन सकिने जनाएको छ ।