वनस्पति घ्यू तेल उत्पादक संघद्वारा विपद् राहत कोषमा १ करोड १ लाख सहयोग

काठमाडौँ । हालै चीनको सिजाङ तिब्बत क्षेत्रबाट आएको भीषण बाढीका कारण रसुवा,नुवाकोट,धादिङ,चितवन र पूर्वी नवलपरासीलगायत जिल्लामा ठूलो मानवीय तथा भौतिक क्षति भएकोप्रति नेपाल वनस्पति घ्यु तेल उत्पादक संघले दुःख व्यक्त गरेको छ ।

विपद् बाट प्रभावित परिवारलाई तत्काल राहत,उपचार तथा आवश्यक सहयोग उपलब्ध गराउन संघ र सदस्य उद्योगहरुले प्रधानमन्त्री राहत कोषमा १ करोड १ लाख रुपैँया सहयोग गर्ने निर्णय गरेका छन् ।

संघका अध्यक्ष विकास दुगडले अन्य सदस्यहरुसहित अर्थमन्त्री डा.स्वर्णिम वाग्लेलाई उक्त सहयोग रकमको चेक हस्तान्तरण गरेका बताइएको छ ।

संघले बाढी तथा विपद्मा ज्यान गुमाउनेहरुप्रति श्रद्धाञ्जली व्यक्त गर्दै शोकसन्तप्त परिवारप्रति समवेदना तथा घाइतेहरुको शीघ्र स्वास्थ्यलाभको कामना गरेको छ । त्यस्तैगरी बेपत्ता व्यक्तिहरुको यथाशीघ्र खोजी तथा उद्धार र प्रभावित क्षेत्रको पुनःस्थापना तथा पुर्वाधार निर्माणमा सरकार तथा सम्बन्धित निकायले प्रभावकारी पहल गर्नुपर्नेमा जोड दिइएको जनाइएको छ ।