नातिनीलाई यौन धन्दामा लगाउने हजुर आमा पक्राउ

काठमाडौं । अर्घाखाँचीमा नातिनीलाई यौन धन्दामा लगाउने हजुर आमा पर्ने एक महिला पक्राउ परेकी छन् ।

गत जेठ १ गतेदेखि एक युवकद्वारा पटकपटक बालिकालाई बलात्कारको शिकार बनाउनमा ४० बर्षीया उनी मुख्य सहयोगी रहेको प्रहरीले जनाएको छ ।।

सन्धिखर्क नगरपालिकाकी १४ बर्षीया बालिकालाई सितगंगा नगरपालिका–१४ का २२ वर्षीय ओमप्रकाश न्यौपानेले त्यसरी पटक पटक बलात्कार गर्ने गरेको यहि असार ५ गते जाहेरी परेको थियो । पीडित पक्षले दिएको जाहेरीमा गत जेठ १ गते राती ती महिलाले बालिकाको घरबाट परिवारलाई कुनै जानकारी नगराई चाउचाउ, बिस्कुट खान जाउँ भन्ने आश्वासन दिदै अन्य लोभ लालचसमेत देखाउँदै बालिकालाई बलात्कारको शिकार बनाएको उल्लेख छ ।

अर्घाखाँचीका प्रहरी प्रमुख डिएसपी अम्मरबहादुर थापा क्षेत्रीले उनले त्यस यता पनि आफ्नो घरमा र पटकपटक जंगल लगायत स्थानमा लगेर न्यौपानेबाट बलात्कार गराई पैसा समेत लिने गरेको पाईएकोले ती दुबैलाई पक्राउ गरिएको बताए । उनीहरु दुवै विरुद्ध मानव बेचबिखन तथा ओसारपसार र जबरजस्ती करणी कसुरमा मुद्धा दर्ता गरि अदालतमा पेश गरेर ६ दिन म्याद थप्दै अनुसन्धान अगाडी बढाईएको डिएसपी थालाले जानकारी दिए ।

यसैगरी, बलात्कारपछि उनको स्वास्थ्य अवस्था बिग्रिँदै गएको र कक्षा ६ मा पढ्ने उनी विद्यालय जान पनि छाडेको जनाइएको छ । त्यसतै, उनी घरमा समेत बेलाबेला बर्बराउँदै मध्यरातमा बाहिर जाने गरेकी छन् ।

बालिकालाई बलात्कार गरे, गराए पश्चात उनलाई कसैलाई जानकारी दिए कुट्ने मार्ने लगायतको धम्की दिदै थप मानसिक पीडा दिदै आएको समेत जनाइएको छ ।