अपर हेवाखोला हाइड्रोको आईपीओ खुल्दै

काठमाडौँ । अपर हेवाखोला हाइड्रोपावर कम्पनी लिमिटेडले २४ असारदेखि आईपीओ बिक्री खुला गर्ने जनाएको छ । कम्पनीको शेयर निष्काशन तथा बिक्री प्रबन्धक एनएमबि क्यापिटल लिमिटेड रहेको छ ।

कम्पनीले सर्वसाधारणका लागि प्रतिसेयर १०० अंकित मूल्यका १५ करोड बराबरको १५ लाख कित्ता आईपीओ निष्काशन गर्ने भएको छ । जसमध्ये ३० हजार कित्ता कर्मचारीका लागि, ७५ हजार कित्ता सामूहिक लगानी कोषमा र सर्वसाधारणका लागि बाँकी १३ लाख ९५ हजार कित्ता छुट्टाइएको छ ।

आईपीओको निष्काशन छिटोमा असार २८ गते र ढिलोमा साउन ६ गते बन्द हुनेछ । लगानीकर्ताले न्यूनतम १० कित्ता शेयरदेखि अधिकतम १ लाख कित्ताका लागि आवेदन दिन पाउनेछन् ।

यसैगरी, उक्त आईपीओमा नेपाल धितोपत्र बोर्डबाट स्वीकृतिप्राप्त सी–आस्वा सदस्य बैंक तथा वित्तीय संस्था र तिनका शाखा कार्यालयबाट आवेदन दिन सकिनेछ । साथ, मेरो शेयर एप तथा वेबसाइटबाट पनि आवेदन दिन सकिनेछ ।

कम्पनीले आईपीओ निष्काशनका लागि गराएको रेटिङ्गमा केयर रेटिङ्ग नेपालको केयर एनपी डबल बी आईएस रेटिङ्ग पाएको छ । जसले कम्पनीको दायित्व बहन गर्ने क्षमतामा मध्यम जोखिम रहेको संकेत गर्दछ ।