झापाको अधिकांश क्षेत्रमा खोला पसेर २७७ घर परिवार प्रभावित

काठमाडौं । झापामा सोमबार रातिदेखि आएको अविरल वर्षाका कारण डुबान भएको तथा नदी–खोलामा आएको बाढी गाउँबस्ती पस्दा २७७ घरपरिवार प्रभावित भएका जनाइएको छ ।

जिल्ला प्रहरी कार्यालय झापाले आज सार्वजनिक गरेको क्षति विवरणमा वर्षाले गौरादह, बाह्रदशी, बिर्तामोड, झापा, कचनकवल, भद्रपुर, गौरीगञ्ज, शिवसताक्षी, कमल, दमकलगायतका स्थानमा बढी क्षति भएको उल्लेख छ ।

कार्यालयले कचनकवल गाउँपालिका–१ मा रहेको पिण्डलबारीमा बिरिङ खोलाको बाढीले नेपाल–भारत सीमास्तम्भ (पिलर नं २८, २९) डुबान भई नदेखिने भएको जनाएको छ । शिवसताक्षी नगरपालिका–१ को हरिदेव ताजपुरियाको कुखुरा फाराममा रु १० लाख ४० हजार बराबरको १ हजार दुई कुखुरा मरेको जनाइएको छ ।

यसैगरी, शिवशताक्षी–११ इलाका प्रहरी कार्यालय झिलझिलेको कार्यालमा २ वटा कम्प्युटर क्षतिग्रस्त भएको छ । त्यस्तै, प्राय घर तथा पसलमा पानी पसेर चामल, दाल लगायतका खाद्य सामग्री नष्ट भएको छ ।

झापा गाउँपालिका–६ बालुबथानमा तिरिङखोलाको बाँध पनि फुटेपछि सशस्त्र प्रहरी, नेपाल प्रहरी र स्थानीयहरु बाँध बाँधेको जनाइएको छ ।