काठमाडौं । बुद्दनगरमा रहेको केएमसी स्कुलको होस्टल क्यान्टिनकी कर्मचारी शनिवार राति झुन्डिएको अवस्थामा मृत फेला परेकी हुन् ।
जिल्ला प्रहरी परिसर काठमाडौंका एसपी दिनेशराज मैनाली र फरेन्सिक चिकित्सक गोपाल चौधरी सहितको टिम घटनास्थलमा राति नै पुगेका थिए । तर, हाल मृत फेला परेकी २१ वर्षीया रमा रायमाझीको शव उठ्न सकेको छैन । आफन्तले हत्या भएको आशङ्का गर्दै स्कुलमा धर्ना दिएका छन् ।
समयमा घर नआएपछि उनकी बहिनी गोमा रमालाई खोज्दै स्कुल पुगेकी थिइन् । जहाँ उनैले दिदिलाई झुन्डिएको अवस्थामा फेला पारेको जनाइएको छ । मृतकका दाइ नाता पर्ने निर्मल रायमाझीले हत्या आशङ्का गर्दै घटनाको अनुसन्धान र छानबिन गर्न माग गरेका छन् ।
त्यस्तै, मृतकका बुबा आमा पनि काभ्रेबाट काठमाडौं आएपछि केएमसीले समयमा तलब नदिएको र एक दिन पनि छुट्टि नदिएको आरोप लगाएका छन् । उनले काम गरे तापनि घरैबाट खर्च पठाइने गरेको जनाइएको छ । जिल्ला प्रहरी परिसर काठमाडौंले घटनाबारे थप अनुसन्धान गरिरहेको छ ।
