म्यानचेस्टर युनाइटेड छाड्दै, कुन क्लबमा जालान् रोनाल्डो?

एजेन्सी । क्रिस्टियानो रोनाल्डोले म्यानचेस्टर युनाइटेड छाड्ने इच्छा व्यक्त गरेको जनाइएको छ । रोनाल्डोले युनाइटेडलाई राम्रो अफर आए आफूलाई क्लब छाडेर जान दिन आग्रह गरेका थिए ।

यस्तैमा, अर्को प्रिमियर लिग क्लब चेल्सीले उनलाई अनुबन्ध गर्ने तयारी गरेको छ । यद्यपि, युनाइटेडले भने रोनाल्डोको करार २०२३ सम्म रहेको बताउँदै आएको छ ।

तर ३७ वर्षीय खेलाडीले क्लब छाड्ने चाहना स्पष्ट गर्दै सोमबार प्रिसिजन ट्रेनिङमा फर्किएनन् । द एथ्लेटिकका अनुसार चेल्सीका मालिक टोड बोहली र रोनाल्डोका एजेन्ट जोर्ज मेन्डेजबीच रोनाल्डोलाई अनुबन्ध गर्ने विषयमा छलफल जारी छ । रोनाल्डोका प्रशंसक रहेका चेल्सीका म्यानेजर थोमस टुकलको इच्छामा पनि स्टामफोर्ड ब्रिजमा आउने नआउने भर पर्ने बताइएको छ ।

बार्सिलोना पनि रोनाल्डोलाई नियालिरहेको स्पेनिस पत्रिका एएसले दाबी गरेको छ । बार्सिलोनाका अध्यक्ष जोन लापोर्टाले रोनाल्डोलाई भित्र्याउने बारे रोनाल्डोका एजेन्ट मेन्डेजसँग सोमबार बार्सिलोनामा भेटेर छलफल गरेको जनाइएको छ । लापोर्टाले गत सिजन नै रोनाल्डोलाई भित्र्याउने प्रयास गरे पनि क्लबको आर्थिक अवस्थाले मौन रहेका थिए ।