लिग टु क्रिकेटः नेपाल स्कटल्याण्डसँग पराजित

काठमाडौं । नेपाल आईसीसी विश्वकप लिग-२ अन्तर्गत त्रिदेशीय सिरिजको चौथो खेलमा घरेलु टोली स्कटल्यान्डसँग पराजित भएको छ । नेपालले कमजोर ब्याटिङलाई निरन्तरता दिएपछि यो परिणाम भोगेको हो ।

आइतबार टिटवुड ग्लासगो मैदानमा अबेर सम्पन्न खेलमा स्कटल्यान्डले नेपालसँग हारको बदला लिँदै नेपाललाई आठ विकेटले पराजित गरेको छ । नेपालले स्कटल्यान्डलाई यही सिरिजको अघिल्लो खेलमा पाँच विकेटले पराजित गरेको थियो ।

यस सिरिजको चार खेलमा नेपालले एउटा मात्र जित हासिल गर्‍यो । नेपाल नामिबियासँग दुवै खेलमा पराजित भएको थियो । जहाँ पहिलो खेलमा ४० र दोस्रो खेलमा ६३ रनले पराजित भएको थियो । तालिकाको छैटौं स्थानमा रहेको नेपालले २० खेलबाट १७ अंक बनाएको छ ।

हारले नेपालको विश्वकप छनोट यात्रा कठिन बन्दै गएको छ । २४ खेलबाट ३४ अंक बटुलेको स्कटल्यान्ड दोस्रो स्थानमा छ । नेपालले दिएको १ सय २९ रनको झिनो विजयी लक्ष्य स्कटल्यान्डले १९ ओभरमा दुई विकेटको क्षतिमा १ सय ३० रन जोड्दै पूरा गरेको हो ।

स्कटल्यान्डका लागि कलुम म्याकलेओडले सर्वाधिक ६४ रन बनाए । केली कोएट्जरले अविजित ४४ तथा क्रिस्टोफरले १० र कप्तान रिची बेरिङटनले अविजित चार रन लिए । बलिङमा नेपालका कप्तान सन्दीप लामिछाने र सोमपाल कामीले एक एक विकेट लिए । यसअघि टस हारेर पहिले ब्याटिङ गरेको नेपालले ३५.५ ओभरमा सबै विकेटको क्षतिमा १ सय २८ रन मात्र बनाएको थियो । आसिफ शेखले नेपालका लागि सर्वाधिक ४० रन लिए ।

विनोद भण्डारीले १३, सन्दीप लामिछानेले २२ तथा देव खनाल र रोहित पौडेलले दश दश रन बनाए । अन्य ब्याट्सम्यानले दोहोरो अंकको रन जोड्न सकेनन् । बलिङमा स्कटल्यान्डका हाम्जा ताहिरले चार विकेट लिए । त्यस्तै मार्क वाटले तीन, गाभिन मेनले दुई तथा किस्टोफर म्याकबाइटले एक विकेट लिए । यस सिरिजसँगै लिगको सबै खेल सकेको ओमान ३६ खेलबाट ४४ अंक जोड्दै शीर्षस्थानमा छ ।

तेस्रो स्थानमा रहेको यूएईले २२ खेलबाट २६ अंक बनाएको छ । चौथो स्थानमा रहेको अमेरिकाको २४ खेलबाट २२ अंक, पाँचौं स्थानमा रहेको नामिबियाको १८ खेलबाट १८ अंक र अन्तिम तथा सातौं स्थानमा रहेको पपुवा न्युगिनीको २० खेलबाट दुई अंक छ ।

नेपालसहित ओमान, यूएई, स्कटल्यान्ड, नामिबिया, अमेरिका र पीएनजी गरी सात टोली सहभागी आईसीसी विश्वकप लिग–२ मा प्रत्येक टोलीले ३६ खेल खेलेपछि शीर्ष तीनमा रहने टोली सन् २०२३ मा भारतमा आयोजना हुने एकदिवसीय विश्वकप क्रिकेटमा छनोट हुनेछन् ।