काठमाडौं । अभिनेत्री तथा ‘मिस नेपाल इन्टरनेसनल २०१२’की विजेता सुवेक्षा खड्काले इन्गेजमेन्ट गरेकी छन् । उनले प्रेमी आश्वासन जोशीसँग बिहिबार एक समारोहकाबीच इन्गेजमेन्ट गरेकी हुन् ।
दुबै परिवारको सीमित व्यक्तिको उपस्थिति रहेको समारोहमा दुवैले एकअर्कोलाई औँठी लगाइदिँदै विवाहको वाचा समेत गरेका छन् ।
गत महिना मात्र आश्वासनले आफ्नो जन्मदिनमा उनलाई फिल्मी शैलीमा हिराको औँठी उपहार दिँदै विवाहको प्रस्ताव गरेका थिए । उनले पनि विवाहको प्रस्ताव स्वीकार गरेकी थिइन् ।
उनीहरूको विवाह कहिले र कहाँ भन्ने बाहिर खुलेको छैन । सुवेक्षा फिल्मकी अभिनेत्री पनि हुन् । उनले फिल्म ‘रणवीर’बाट अभिनेत्रीको रूपमा फिल्म डेब्यू गरेकी थिइन् । त्यसपछि उनले फिल्म ‘प्रेमा’मा काम गरेकी छन् ।
प्रेमकथामा बनेको ‘प्रेमा’को आगामी चैत ४ मा प्रदर्शन मिति तय भएको छ । उनी अभिनय भन्दा पनि बढी स्टेज कार्यक्रम होस्टको रूपमा व्यस्त छिन् । उनी ‘वल्र्ड मिस युनिभर्सिटी नेपाल २०१७’की विजेता पनि हुन् ।
