शिक्षिकाको कुटाइले ६ वर्षीय बालकको आँखामा गम्भीर चोट, पीडित परिवार न्यायको खोजीमा

पश्चिम नवलपरासी । पश्चिम नवलपरासीको प्रतापपुर गाउँपालिका १ स्थित एच पाठशालामा शिक्षिकाको कुटपिटबाट एक ६ वर्षीय (प्रशान्त चौधरी) बालकको आँखामा गम्भीर चोट लागेको छ । युकेजीमा अध्ययनरत प्रशान्त चौधरीलाई शिक्षिका सन्जु चौधरीले पिट्दा देब्रे आँखाले देख्न नसक्ने गरी चोट लागेको हो ।

बालकका बुवा नरेन्द्र प्रसाद चौधरीका अनुसार चिकित्सकले देब्रे आँखाले स्थायी रूपमा देख्न नसक्ने बताएका छन् । उनले भने, “एक आँखामा गम्भीर चोट लागेको छ, अर्को आँखाले पनि राम्रोसँग देख्न गाह्रो छ । दोषी शिक्षिकामाथि कारबाही हुनुका साथै उपचारको व्यवस्था गरिनुपर्छ ।”

घटना र उपचारको अवस्था
मंसिर १८ गते विद्यालयमा दुई बालकबीच झगडा छुटाउने क्रममा शिक्षिकाले प्लास्टिकको लठ्ठीले पिट्दा बालकको आँखा गम्भीर रूपमा घाइते भएको थियो । घाइते बालकलाई परासी आँखा अस्पताल, भैरहवा र काठमाडौँको तिलगंगा आँखा अस्पतालसम्म उपचारका लागि लगिएको थियो ।

तर, पीडित परिवारले कानुनी प्रक्रिया सुरु गरेपछि विद्यालयले उपचार खर्च रोकिदिएको आरोप लागेको छ । राष्ट्रिय मानव अधिकार आयोग बुटवलका प्रमुख हरि प्रसाद ज्ञवालीका अनुसार सिविन नेपालको पहलमा हाल बालकको उपचार भइरहेको छ ।

कानुनी प्रक्रिया र शिक्षिकाको फरार स्थिति
बालकका बुवाले मंसिर १९ गते इलाका प्रहरी चौकी सेमरीमा उजुरी दिन गए पनि घटनालाई इलाका प्रहरी कार्यालय बर्दघाट पठाइएको थियो । उपचारपछि बालकको स्वास्थ्य प्रतिवेदन प्राप्त भएपछि मात्र प्रहरीले पुस १६ गते उजुरी दर्ता गरेको थियो ।

पुस १९ गते प्रहरीले जिल्ला अदालत परासीमा मुद्दा दायर गर्दै शिक्षिका सन्जु चौधरीलाई पक्राउ गर्न अनुमति लिएको थियो । तर, शिक्षिका फरार रहेकाले प्रहरीको खोजी कार्य जारी रहेको जिल्ला प्रहरी कार्यालय पश्चिम नवलपरासीका डीएसपी रेशम बोहोराले जानकारी दिए ।

विद्यालयको धारणा
एच पाठशालाका प्रिन्सिपल सुजित कुमार गुप्ताले घटनालाई दुस्खद भन्दै पीडित बालकको उपचार, निस्शुल्क अध्ययन र भविष्यमा रोजगारीको ग्यारेन्टी गर्ने प्रतिबद्धता व्यक्त गरेका छन् ।

बालकको आँखामा स्थायी असर परेपछि यो घटना शिक्षा क्षेत्र र बालअधिकारमा गम्भीर लापरवाहीको उदाहरण बनेको छ । पीडित परिवारले न्यायका लागि पहल गरिरहेको छ भने दोषीलाई कानुनी दायरामा ल्याउन सबै पक्षको सहयोग आवश्यक छ ।