रौतहट । रौतहटको गौर नगरपालिका ४ स्थित राइजिङ नेपाल सुधार केन्द्रमा एक व्यक्तिमाथि अमानवीय रूपमा गरिएको कुटपिटको भिडियो सामाजिक सञ्जालमा भाइरल भएपछि प्रहरीले केन्द्रका संचालकसँग सोधपुछ गरेको छ ।
जिल्ला प्रहरी कार्यालय रौतहटका सूचना अधिकारी तथा प्रहरी नायब उपरीक्षक (डीएसपी) दिपक कुमार रायका अनुसार वीरगञ्ज महानगरपालिका ८ निवासी तथा सुधार केन्द्रका संचालक सुरज गुप्तालाई बोलाएर सोधपुछ गरिनुका साथै घटना बारे प्रारम्भिक अनुसन्धान सुरु गरिएको हो ।
प्रारम्भिक अनुसन्धानका क्रममा सार्वजनिक भएको भिडियो करिब ८ महिना पुरानो भएको खुल्न आएको डीएसपी रायले जानकारी दिए । उनका अनुसार कुटपिटमा परेका युवक २०८१ साल मंसिर १५ गते सुधार केन्द्रबाट निस्किएको र हाल केन्द्रमा रहेका ८ जनासँग सोधपुछ गर्दा यस्ता घटना अहिले दोहोरिएको नभएको पुष्टि भएको छ ।
कुटपिट गर्ने व्यक्ति तत्कालीन कर्मचारी शिवु पाण्डे रहेको र हाल उनी सुधार केन्द्रमा नरहेको पाइएको छ । कुटपिटमा परेका व्यक्ति गौरका रितेशकुमार यादव रहेको पहिचान खुलेको छ भने उनलाई कुटपिट गर्नुका कारण हालसम्म नखुलेको प्रहरीले जनाएको छ ।
सामाजिक सञ्जालमा सार्वजनिक भएको भिडियोले सुधार केन्द्रमा भइरहेका गतिविधि बारे गम्भीर प्रश्न उठाएका छन् । प्रहरीले घटना बारे थप अनुसन्धान जारी राखेको जनाएको छ ।
