काठमाडौँ । राष्ट्रिय स्वतन्त्र पार्टी (रास्वपा)ले आफ्ना मन्त्री तथा सांसदहरुबाट मासिक लेबी संकलन गर्ने निर्णय गरेको छ । पार्टीको संसदीय दलको बैठकले यो प्रस्तावलाई औपचारिक रुपमा अनुमोदन गरेको छ ।
सिंहदरबारमा बसेको बैठकपछि मुख्य सचेतक कबिन्द्र बुर्लाकोटीले जानकारी दिँदै सांसद र मन्त्रीका लागि फरक फरक रकम तोकिएको बताए । निर्णयअनुसार सांसदहरुको मासिक १६ हजार ५ सय रुपैँया बुझाउनुपर्नेछ भने मन्त्रीहरुका लागि यो रकम १८ हजार रुपैँया निर्धारण गरिएको छ।
त्यस्तैगरी मन्त्रीसँग कार्यरत स्वकीय सचिवका हकममा पनि लेबी लागू गरिने भएको छ । उनीहरुका लागि मासिक २ हजार रुपैँया तिर्ने व्यवस्था गरिएको बताइएको छ । पार्टीले आन्तरिक व्यवस्थापन तथा गतिविधि सञ्चालनलाई व्यवस्थित बनाउन यस्तो लेबी प्रणाली लागू गरेको जनाइएको छ ।
