साझँ ७ बजेसम्म बस्ती खाली नगरे भोलि बिहानै डोजर चल्ने चेतावनी

काठमाडौँ । काठमाडौँमा नदी किनारमा बसेका अवैध सुकुम्बासी बस्ती हटाउने प्रक्रिया अघि बढाइएको छ । जिल्ला प्रशासन कार्यालयले सूचना जारी गर्दै त्यस्ता स्थानमा बसोबास गरिहेका सबैलाई आज साँझ ७ बजेसम्म घरटहरा खाली गर्न निर्देशन दिएको छ ।

प्रशासनले सार्वजनिक तथा सरकारी जमिनमा वर्षौदेखि भइरहेको अतिक्रमणका कारण नदीको बहाबमा अवरोध,शहरी पूर्वाधारमा असर र मानव जीवनमा जोखिम बढेको उल्लेख गरेको छ । त्यसैले तत्काल बस्ती खाली गर्नुपर्ने आवश्यकता औँल्याइएको छ ।

बसोबासकर्तालाई आफ्ना सामान,लत्ताकपडा र घरपालुवा जनावर र सुरक्षित स्थानमा सार्न आग्रह गरिएको छ । विशेषगरी बालबालिका ,वृद्धवृद्धा ,गर्भवती महिला र अपांगता भएका व्यत्तिलाई प्राथमिकतामा राखेर स्थानान्तरण गर्न भनिनुका साथै आवश्यक परे सुरक्षा निकायको सहयोग लिन सकिने जनाइएको छ ।

निर्धारित समयसीमा नमाने भोलि बिहान ६ बजेदेखि डोजर प्रयोग गरी संरचना हटाइने चेतावनी दिइएको छ । प्रभावित परिवारलाई अस्थायी बसोबासको व्यवस्था गर्ने र वास्तविक भूमिहिनको पहिचान गरी छिट्टै दिर्घकालीन समाधान खोजिने प्रशासनले जनाएको छ ।