काठमाडौं । काठमाडौं उपत्यका ट्राफिक प्रहरी कार्यालय ले काठमाडौं उपत्यकामा ट्राफिक नियम उल्लंघन गर्ने २ हजार ४५३ जना सवारी चालकलाई एकै दिन कारवाही गरेको जनाएको छ । २४ घण्टाको कारवाहीबाट ११ लाख ५१ हजार रुपैयाँ राजस्व संकलन भएको कार्यालयले जानकारी दिएको छ ।
कारवाहीमा पर्नेहरूमध्ये १०५ जना मादक पदार्थ सेवन (मापसे) गरेर सवारी चलाउने चालक रहेका छन् । यस्तै राइड शेयरिङमा २३८ जना, रातो बत्ती उल्लंघन गर्ने १८४ जना र तीव्र गतिमा सवारी चलाउने १८६ जना चालक कारवाहीमा परेका छन् ।
त्यसैगरी लेन मिच्ने १४ जना, फुटपाथमा सवारी चलाउने १०० जना, हर्न निषेध उल्लंघन गर्ने ११९ जना तथा एकतर्फी सडकमा सवारी चलाउने १३९ जना चालकलाई पनि कारवाही गरिएको प्रहरीले जनाएको छ ।
अन्य विभिन्न ट्राफिक नियम उल्लंघन गर्ने १ हजार ३६८ जना चालकलाई समेत कारवाही गरिएको कार्यालयले जनाएको छ ।
