रौतहट । शिक्षा क्षेत्रमा उत्कृष्ट ठहर भएको मौलापुर नगरपालिकाकी मेयर रिना कुमारी साह PAN “प्यान उत्कृष्ट नगरपालिका २०८२ पुरस्कार”बाट सम्मानित भएकी छिन्।

सामुदायिक विद्यालयका प्रधानाध्यापकहरूको संस्था Principals Association of Nepal ( PAN) को  दोस्रो राष्ट्रिय सम्मेलनको अवसरमा पोखरामा शुक्रवार आयोजित एक भव्य समारोहको बिच शिक्षा, विज्ञान तथा प्रविधि मन्त्री  रघुजी पन्तले मेयर साहलाई पुरस्कार सहित सम्मानित गरेका हुन्।

मौलापुर नगरपालिका शिक्षाको मापदण्डको आधारमा मधेश प्रदेशमै उत्कृष्ठ नगरपालिका घोषित भएको थियो। शिक्षाको क्षेत्रलाई प्राथमिकतामा राख्दै उत्कृष्ट प्रदर्शन गरेको मौलापुर नगरपालिका मधेश प्रदेशमै शिक्षाका मापदण्डको आधारमा “उत्कृष्ट नगरपालिका” को रुपमा चयन भएको थियो।

सामुदायिक विद्यालयका प्रधानाध्यापकहरूको संस्था Principals Association of Nepal (PAN) द्वारा गठित पाँचजना विज्ञहरूको मूल्याङ्कन समितिले शिक्षाका २५ वटा मापदण्डहरूका आधारमा मौलापुर नगरपालिकालाई  उत्कृष्ट नगरपालिका २०८२ पुरस्कार प्रदान गर्ने निर्णय गरेको थियो।

शिक्षाविद् प्राध्यापक डाक्टर विद्यानाथ कोइरालाको संयोजकत्वमा गठित समितिले मूल्याङ्कन गरेको थियो। मौलापुर नगरपालिकाको समग्र शैक्षिक अवस्था, शिक्षा क्षेत्रको बजेट विनियोजन, बाल शिक्षा/इसीडी व्यवस्था, सिपमूलक शिक्षाको प्रवर्धन, शिक्षक र विद्यार्थीको सन्तुष्टि देखिएको छ।

त्यस्तै, विद्यालय बाहिरका बालबालिकालाई शिक्षामा जोड्ने पहल, शिक्षण सिकाइको अनुगमन, स्थानीय पाठ्यक्रमको प्रयोग, सूचना प्रविधिको उपयोग, छात्रालाई शिक्षामा जोड्ने कार्यक्रम, विद्यालयको भौतिक पूर्वाधार, तथा गुनासो व्यवस्थापन जस्ता २५ वटै मापदण्डमा मौलापुरले उत्कृष्टता प्रदर्शन गरेको PAN ले जनाएको छ।

मेयर रिना कुमारी साहको कुशल नेतृत्व, जनप्रतिनिधि, कर्मचारी, शिक्षक, अभिभावक, विद्यार्थी तथा सरोकारवालाको सहकार्यले गर्दा यो उपलब्धि हासिल भएको भन्दै मौलापुर नगरपालिकाले सबैप्रति कृतज्ञता व्यक्त गरेको छ।

मौलापुर नगरपालिकाले बालिका लाई शिक्षा प्रति आकर्षित गराउन निःशुल्क साईकल बितरण देखि उच्च शिक्षा अध्ययनरत बालिका लाई ल्यापटप वितरण गर्दै आएको छ।

मौलापुर नगरपालिकाले विकास बजेटको ४० प्रतिशत बजेट शिक्षामा लगानी गर्दै नगर प्रहरीको ठाउँमा नगर शिक्षक राखेको प्रमुख प्रशासकीय अधिकृत रामबाबु साहले बताएका छन्। लगातार प्रयास र संघर्ष गर्दै शैक्षिक क्षेत्रमा आमूल परिवर्तन गरी देशैभरका SEE परीक्षामा ४४% विद्यार्थी उत्तीर्ण हुँदा मौलापुर नगरपालिकामा ७५% उत्तीर्ण विद्यार्थी भएको मौलापुर नगरपालिकाले जनाएको छ।

मेयर रिना कुमारी साह पूर्व मन्त्री तथा आमजनता पार्टीका अध्यक्ष प्रभु साहको पत्नी हुन्। उनी दोस्रो पटक मौलापुर नगरपालिकाको मेयर पदमा निर्वाचित भएकी हुन्।