काठमाडौं । निर्वाचन आयोगले मतगणना सुरु भएको २४ घण्टाभित्रै अन्तिम परिणाम सार्वजनिक गर्ने स्पष्ट पारेको छ । निर्वाचनको अघिल्लो दिन बुधबार आयोग परिसरमा आयोजित पत्रकार सम्मेलनमा कार्यवाहक प्रमुख निर्वाचन आयुक्त रामप्रसाद भण्डारीले मतदान सम्पन्न भए लगतै मतपेटिका संकलन कार्य सुरु गरिने जानकारी दिए ।

उनका अनुसार, मतपेटिका प्राप्त भई गणना सुरु गरिएको २४ घण्टाभित्र नतिजा सार्वजनिक गरिनेछ । साथै समानुपातिकतर्फको मतपरिणाम पनि छिट्टै सार्वजनिक गर्ने तयारी गरिएको उनले बताए ।

आयागले निर्वाचनका सम्पुर्ण तयारी पुरा भईसकेको उल्लेख गर्दै मतदातालाई निर्धक्क र उत्साहपुर्वक मतदानमा सहभागी हुन् आग्रह गरेको छ । त्यसैगरी भौगोलिक विकटता र पहुँचको अवस्थालाई ध्यानमा राख्दै १५ जिल्लाका ६१ मतदानस्थलबाट मतपेटिका हेलिकप्टर मार्फत संकलन गरिने आयोगले जनाएको छ ।