सातै प्रदेशमा राष्ट्रिय वाणिज्य बैंकले खुलायो दरखास्त आह्वान

काठमाडौं । राष्ट्रिय वाणिज्य बैंक लिमिटेडले सातै प्रदेशका लागि चौथो तह अन्तर्गत सहायक र सहायक (नगद) पदमा ६२ जनाका लागि आवेदन खुलाएको छ। बैंकले खुला प्रतियोगितामार्फत स्थायी पदपूर्ति गर्ने गरी दरखास्त आह्वान गरेको जनाएको छ।

आवेदन दिन इच्छुक उम्मेदवारले कम्तीमा प्लस टू उत्तीर्ण गरेको तथा लोक सेवा आयोगले गत कात्तिक १५ गते सञ्चालन गरेको पूर्वयोग्यता परीक्षा पास गरेको हुनुपर्नेछ। उमेर १८ वर्ष पूरा भई २५ वर्ष ननाघेको हुनुपर्ने प्रावधान राखिएको छ।

योग्यता पुगेका उम्मेदवारले फागुन २१ गतेसम्म नियमित शुल्कमा र फागुन २८ गतेसम्म दोब्बर दस्तूर तिरी अनलाइनमार्फत आवेदन दिन सक्नेछन्। लिखित परीक्षा लोक सेवा आयोगसँग समन्वय गरी सम्बन्धित प्रदेशका तोकिएका केन्द्रमा सञ्चालन गरिने बैंकले जनाएको छ। विस्तृत जानकारी बैंकको आधिकारिक वेबसाइटमार्फत प्राप्त गर्न सकिनेछ ।