काठमाडौं । प्रतिनिधि सभा निर्वाचन नजिकिँदै जाँदा सुरक्षा संयन्त्रलाई थप सुदृढ बनाइएको छ। निर्वाचनलाई शान्तिपूर्ण, स्वच्छ र निष्पक्ष रूपमा सम्पन्न गराउने उद्देश्यले सशस्त्र प्रहरी बल नेपाल प्रधान कार्यालय हल्चोकले १६ सय सुरक्षाकर्मी विभिन्न जिल्लामा खटाएको जनाएको छ। शुक्रबार मुख्यालयबाट उक्त जनशक्ति बाहिरी जिल्लातर्फ परिचालन गरिएको हो ।

२१ फागुनमा निर्धारित प्रतिनिधि सभा निर्वाचनलाई ध्यानमा राख्दै उपत्यकामा कार्यरत अतिरिक्त सुरक्षाकर्मीलाई समेत आवश्यकताअनुसार चरणबद्ध रूपमा जिल्लामा परिचालन गर्न थालिएको बताइएको छ। मतदान केन्द्रको सुरक्षा, मतपेटिका सुरक्षित ढुवानी, संवेदनशील क्षेत्रको निगरानी तथा सम्भावित जोखिम नियन्त्रणका लागि विशेष सुरक्षा रणनीति कार्यान्वयनमा ल्याइएको सशस्त्र प्रहरीले जनाएको छ।

स्रोतका अनुसार निर्वाचन अवधिभर सबै सुरक्षा निकायबीच उच्चस्तरीय समन्वय कायम गरिनेछ। नेपाल प्रहरी, नेपाली सेना तथा राष्ट्रिय अनुसन्धान विभागसँग सहकार्य गर्दै सुरक्षा व्यवस्थालाई थप मजबुत बनाइने तयारी छ। अति संवेदनशील र संवेदनशील मतदान केन्द्रमा थप सुरक्षाकर्मी तैनाथ गरिनेछ भने मोबाइल गस्ती टोलीलाई आकस्मिक घटनामा तत्काल परिचालन गर्ने व्यवस्था मिलाएको बताइएको छ।

निर्वाचन आयोग नेपाल को कार्यतालिकाअनुसार प्रतिनिधि सभा निर्वाचन २१ फागुनमा सम्पन्न हुने तय भएको छ। मतदातालाई निर्धक्क रूपमा मतदान गर्ने वातावरण सुनिश्चित गर्न सुरक्षा निकाय उच्च सतर्क अवस्थामा रहेको जनाइएको छ। आवश्यकता अनुसार थप जनशक्ति परिचालन गर्न सकिने पनि सशस्त्र प्रहरीले स्पष्ट पारेको छ।

सरकारले निर्वाचनलाई लोकतन्त्रको महत्वपूर्ण अभ्यासका रूपमा लिँदै कुनै पनि प्रकारका अनैतिक गतिविधि हुन नदिन कडाइका साथ सुरक्षा व्यवस्था मिलाइएको स्पष्ट पारेको छ। नागरिकलाई ढुक्क भएर मतदान प्रक्रियामा सहभागी हुन सुरक्षा निकायले आग्रह गरेका छन्।