ट्रक दुर्घटना हुँदा चालकको निधन

काठमाडौं । कान्तिलोकपथअन्तर्गत मकवानपुरको बगुवा खोलाको पुल नजिक ट्रक दुर्घटना हुँदा चालकको मृत्यु भएको छ।

जिल्ला प्रहरी कार्यालय मकवानपुरका प्रवक्ता प्रहरी नायब उपरीक्षक (डीएसपी) माधव काफ्लेका अनुसार हेटौँडाबाट ललितपुरस्थित निर्माणाधीन बागमती जलविद्युत् आयोजनाका सामग्री बोकेर गइरहेको ट्रक गएराति दुर्घटनामा परेको हो। दुर्घटनामा परी हेटौँडा उपमहानगरपालिका–३ निवासी ३० वर्षीय दलबहादुर बर्तौलाको घटनास्थलमै मृत्यु भएको प्रहरीले जनाएको छ।

दुर्घटनापछि बगुवा खोलामा डुबेको ट्रकलाई यान्त्रिक उपकरणको सहायताले गएराति नै बाहिर निकालिएको थियो। चालक बर्तौलाको शव ट्रकको चालक सिटमै फेला परेको प्रवक्ता काफ्लेले जानकारी दिए।

ट्रकका सहचालक भने दुर्घटनाअघि नै ट्रकबाट हामफालेर सकुशल ज्यान जोगाउन सफल भएको प्रहरीले जनाएको छ। प्रहरीले दुर्घटनाको कारणबारे थप अनुसन्धान गरिरहेको बताइएको छ।