बिजुलीको पोलमा मोटरसाइकल दुर्घटना : १५ वर्षीय किशोरको निधन

बारा । बाराको कलैया उपमहानगरपालिका–१७ ब्रह्मपुरीमा मोटरसाइकल अनियन्त्रित भई बिजुलीको पोलमा ठोक्किँदा एक १५ वर्षीय किशोरको मृत्यु भएको छ भने अर्का एक जना घाइते भएका छन्।

आइतबार बिहान करिब ८ः२५ बजे भवानीपुरबाट ब्रह्मपुरीतर्फ जाँदै गरेको ना ४५ प २१७७ नम्बरको मोटरसाइकल सडक छेउमा रहेको विद्युत् पोलमा ठोक्किएर दुर्घटनामा परेको थियो।

दुर्घटनामा मोटरसाइकल चालक कलैया उपमहानगरपालिका–३ निवासी अजित मन्सुरका १५ वर्षीय छोरा सोयब मन्सुर गम्भीर घाइते भएका थिए। उनलाई उपचारका लागि प्रादेशिक अस्पताल कलैया पुर्‍याइए पनि बिहान करिब ९ बजे चिकित्सकले मृत घोषणा गरेको बारा प्रहरीका प्रवक्ता डीएसपी मीनबहादुर घलेले जानकारी दिए।

मोटरसाइकलमा पछाडि सवार सोही स्थानका साबिर हुसेन अन्सारीका १५ वर्षीय छोरा साहिद अन्सारी भने सामान्य घाइते भएका छन्। उनको हातमा चोट लागेको र उपचार भइरहेको प्रहरीले जनाएको छ।

दुर्घटनाको सूचना प्राप्त हुनासाथ अस्थायी प्रहरी पोस्ट गंगापुरबाट असई मोहम्मद हुसेन देवानको नेतृत्वमा प्रहरी टोली घटनास्थल पुगेको थियो। मृतकको शव हाल प्रादेशिक अस्पताल कलैयामा राखिएको छ।

प्रहरीले दुर्घटनाको कारणबारे थप अनुसन्धान अघि बढाएको जनाएको छ।