पुजन धिताल
श्री पार्वती माध्यमिक बिद्यालय ढुङ्खर्क-८ काभ्रेको आयोजना र नेपालका वरिष्ठ गजलकार तथा गजल सम्राट ज्ञानुवाकर पौडेलको प्रमुख आतिथ्यतामा यहि पौष १४ गते बिहिवार ढुङ्खर्कमा स्रस्टा छवि श्रेष्ठको प्रथम गजल सङ्ग्रह ‘लोली’ विमोचन गरिएको छ । विद्यालयका प्रधानाध्यापक गोविन्दप्रसाद शर्माले सभापतित्व गर्नुभएको कार्यक्रमको शिक्षक दामोदर सुवेदीले सञ्चालन गर्नुभएको थियो ।
कार्यक्रममा रेडियो नेपालका विशिष्ट श्रेणीका लोकगायक मच्छेश्वर सापकोटाको सुमधुर गीतमा दर्शकहरु जमेका थिए भने प्रथम साहित्यिक हिमाल आरोही तथा प्रथम मेचीमहाकाली साहित्यिक डौडकर्ता लक्ष्मण सापकोटा, पार्वती माध्यमिक विद्यालयका शिक्षक अर्जुन घिमिरे, हातेमालो साहित्य संगम काभ्रेका अध्यक्ष रमेश घिमिरे (कर्मशिल मान्छे), उपाध्यक्ष अन्जला तिमल्सिना, सदस्यहरु सौगात सहयात्री, सुजना तिमल्सिना, उषा आचार्य, सरस्वती माध्यमिक विद्यालयका सहायक प्रधानाध्यापक ठुलोबाबु तिमल्सिना, ढुंखर्क बोडिङ स्कुलकी शिक्षिका राधिका तिमल्सिना लगायत पार्वती माध्यमिक विद्यालय र सरस्वती माध्यमिक विद्यालयका करिव तिन दर्जन भन्दा बढी स्थानिय सर्जकहरुले सृजना वाचन गरेका थिए । कार्यक्रममा प्रथम मेचीमहाकाली साहित्यिक डौड सफलतापुर्बक सम्पन्न गर्नुभएकोमा साहित्यकार लक्ष्मण सापकोटालाई सम्मान समेत गरिएको थियो ।
काभ्रेको ढुंखर्क भेगमानै पहिलोपटक गजल विमोचन समारोह आयोजना गरिएकोमा खुसी ब्यक्त गर्दै नवोदित स्रस्टा छवि श्रेष्ठले नेपाली साहित्याकाशमा छुट्टै छवि बनाउन सफल हुनेकुरामा उपस्थित साहित्यानुरागी महानुभावहरुलाई आस्वस्त पार्दै प्रमुख अतिथि पौडेलले ‘लोली’ गजल सङ्ग्रहको तारिफ, टिप्पणी र समिक्षा गर्दै सफलताको शुभकामना दिनुभएको थियो । कार्यक्रममा ढुंखर्क, चलाल गणेशस्थान र च्यासिङखर्कका गरि ६०० भन्दा बढी साहित्य प्रेमीहरुको उपस्थिती रहेको थियो । जम्मा ९२ पेजको विमोचित गजल सङ्ग्रह ‘लोली’ मा जम्मा ७५ वटा गजलहरु समावेश गरिएको छ भने समग्रमा सम्पुर्ण विषयवस्तु छुवाएर लेखिएका गजलहरु पाउन सकिनेछ । भर्खरै गजल सिक्दै गरेका र सिक्न चाहनेहरुको लागी ‘लोली’ भरपर्दो माध्यम भएको बताउदै स्रस्टा छवि श्रेष्ठले एक एक प्रती किनेर पढिदिनुहुन आग्रह गर्नुभयो |
