झापा । मुलुकको उर्वर माटोमा पसिना बगाउनु वेकार ठानेर दैनिक जसो दुई हजार बढी नेपाली युवाहरु वैदेशिक रोजगारीका लागि विदेश प्रस्थान गरिरहेका छन् ।
युवाको अनुपस्थितिले गाउँघर सुनसान मात्र नभई कृषि प्रधान यो मुलुकको धेरै खेतखलिहान बाँझो नै छ । तर यही माटोमा सुन फलाउँदै ठूलो परिमाणमा रकम आफ्नो देश भित्र्याइरहेका छन् भारतीय किसानहरुले ।
भारतको विहार दरबंगा घर भएका विनोद रायले झापाको बिर्तामोडस्थित—४ स्थित अदुवा खोलाको छेवैमा तरकारी खेती गरेको ६ बर्ष बित्यो । १७ वर्ष अघि आफन्तका साथ नेपाल प्रवेश गरेका रायले तरकारी खेती गरेरै आफ्नो ६ जनाको परिवार पालिरहेका छन् । त्यस्तै बिर्तामोड—९, सैनिकमोडमा अर्का भारतीय नागरिक मोहन यादवले भाडामा लिएको जग्गामा तरकारी खेती गरेर वार्षिक लाख रुपैयाँ भन्दा बढी आम्दानी गरिरहेका छन् ।
१२ वर्षको उमेरमा भारतको विहारबाटै आमाबुबाको साथ नेपाल छिरेर मोहनले विगत लामो समयदेखि तरकारी उत्पादन गरिरेहका छन् । राय र यादव उदाहरण मात्रै हुन् । आजभोली भारतीय नागरिकहरु झापाका सिमावर्ती शहरहरुमा कृषी कर्म गरेर जीविको पार्जन गर्न आउनेको संख्या बढ्दै गएको छ । सहरआसपासका जमिन भाडामा लिने र तरकारी उत्पादन गरी बिक्री गरी उनीहरुले मनगगे आम्दानी लिइरहेका छन् ।
झापाको बिर्तामोड, दमक र भद्रपुर लगायत सिमाका शहरहरुमा जग्गा भाडामा लिएर तरकारी खेती गर्ने उनीहरुका आफन्त र छिमेकीहरु धेरै छन् । लामो समयदेखि तरकारी खेती गर्दै आएका कतिपय भारतीय किसानहरुले भारतमा रहेका परिवार समेत पालिरहेका छन् ।
नेपाली किसानहरुलाई सरकारबाट उपलब्ध बिऊ, बिजन र प्रविधीहरुमा सहुलियत र सुविधा दिइरहदा पनि कृषी पेशामा अझै आर्कर्षित गर्न सकेको छैन । तर यी किसानले भनै आफ्नै पौरख र अनुभवबाट यतिका वर्षसम्म तरकारी खेती गरिरहेका छन् ।.
भारतीय नागरिकले यसरी कृषी कर्म गरेको जिल्ला कृषि विकास कार्यालय झापामा कुनै जानकारी छैन । भारतीय नागरिकलाई तरकारी खेतीका लागि कुनै सहुलियत नहुने भएकाले सम्पर्कमा पनि नआएको कार्यालयकी सुचना अधिकृत शितल भट्टराईले जानकारी दिनुभयो ।
यसरी भारतबाट आएर नेपाली भूमि भाडामा लिएर तरकारी खेतीबाट यतिको राम्रो आम्दानी गरिरहेका छन्, भारतीयहरु । तर, बिडम्बना मुलुकका युवाहरु भने जमिन बाँझो राखेर राम्रो कमाई हुने आशामा तातो वालुवा चाल्न विदेशतिर लम्किरहेका छन् ।
न्यूज २४ बाट
