रौतहटको लक्ष्मीनिया २ विजयपुरको सिङ्गो बस्ती नै आफ्नो नाम मा नामसारी गर्ने दुई भूमाफियालाई जिल्ला अदालत रौतहटले ७० लाख रुपैंया धरौटी माँग गरेको छ ।
सरकारी कागज किर्ते गरेर ठगी गरेको आरोपमा पक्राउ परेका फतुवा हर्साहाका सुरेन्द्र राय यादव र नवलकिशोर राय यादवलाई अदालतले आज जनही ३५ लाख रुपैंया धरौटी मागेको हो ।
यादवद्धयले नक्कली नागरिकताको प्रमाणपत्रको आधारमा काठमाण्डौ जिल्ला अदालत समेतलाई झुक्याएर सरकारीकरण भएको लक्ष्मिनिया–२ (क) बिजयपुरको किता नम्बर १०८ र २४६ को २ विघा ९ कट्ठा १३ धुर जग्गा फतुवा हर्षाहा–६ का नवलकिशोर राय यादवको नाममा पास गराएका थिए । बस्ती सहितको जग्गा व्यक्तिगत नाममा पास गराएको खबर सँचारमाध्यममा आए पछि जिल्ला प्रहरी कार्यालय रौतहटले फागुन २ गते सुरेन्द्र र नवलकिशोर लाई कटहरीया बाट पक्राउ गरेको थियो । नक्कली कागजातको आधारमा नेपाल सरकारलाई समेत ठगी गरेको आरोपमा दायर भएको ठगी मुद्दामा आज जिल्ला न्यायधिश लक्ष्मीनाथ ढुंगानाको एकल इजलाशले मुलुकी ऐन अदालती बन्दोबस्तको दफा ११८ को देहाय ५ र १० बमोजिम दुवै अभियुक्त सँग जनही पैतिस लाख रुपैया धरौटी माँग गरेको छ । जिल्ला अदालत रौतहटले ठगी मुद्दामा माँग गरेको यो रकम रौतहटमा हाल सम्मैकै सार्वाधिक धरौटी समेत भएको जिल्ला अदालत रौतहटका श्रेस्तेदार चिन्तामणी शर्माले बताए । धरौटी रकम जम्मा गर्न नसकेपछि आज सुरेन्द्र र नवलकिशोर राय यादव लाई जिल्ला कारागार पठाइएको छ ।
