काठमाडौं, २१ पुस । नेपाली कांग्रेसभित्र अहिले नेतृत्व परिवर्तनको बहसले उग्र रुप लिएको छ । युवा नेताहरुले जसरी भएपनि पार्टी सभापति शेरबहादुर देउवालाई हटाउने तयारी गरेका छन् ।
यो निर्वाचनमा पार्टीले नराम्रो पराजय व्यहोर्नुको प्रमुख कारण नै नेतृत्वको अक्षमता र अदुरदर्शीता कारण देखाउँदै युवा नेताहरुले गुट भेला आह्वान गरिरहेका छन् । देउवालाई सार्वजनिक रुपमै हटाउनुपर्ने अभिव्यक्ति दिएर चर्चामा आएका युवा नेता गगनकुमार थापाले अबको नेतृत्व आफूले नै लिने समेत बताउँदै आएका छन् ।
त्यसको लागि कांग्रेसमा “अर्ली महाधिवेशन” बोलाउने पक्षमा युवा पुस्ताका नेताहरु सक्रिय भएर लागेका छन् । त्यसको नेतृत्व थापाले गरेका छन् । पहिले केन्द्रिय कार्यसमिति बैठक बोलाउनुपर्ने र चुनावको गम्भिर समिक्षा गर्नुपर्ने उनीहरुको जोड छ । त्यस्तै महासमिति बैठक बोलाउने र महाधिवेशन बोलाउने अनि देउवालाई हटाउने युवा नेताहरुको गोप्य तयारी सुरु भएको स्रोतको दाबी छ ।
अर्का नेता धनराज गुरुङका अनुसार पार्टीमा अब तीन वटा विकल्प रहेको छ । पहिलो कन्द्रिय समिति बोलाएर हारको समिक्षा गर्ने, अनि दोस्रो महासमिति बोलाउने र तेस्रोमा अर्ली महाधिवेशन बोलाएर नेतृत्व परिवर्तन गर्ने । त्यस्तै उनले गगनले अबको पार्टीको नेतृत्व आफूले लिने पनि उद्धघोष गरिसकेको जानकारी दिए ।
थापाले युवा नेताहरुको एक गोप्य भेलामा भनेका छन्,“एक वर्षभित्र देउवा हट्छन्, म नै सभापति बन्छु, अरुले कांग्रेस हाँक्न सक्दैनन् । साथीहरुले यो मौका नगुमाऔं, अब कांग्रेस बनाउने मौका आएको छ ।”युवा नेताहरुको यो जनमतलाई पार्टीका केही शीर्ष नेताहरुले पनि साथ दिएको खुलासा भएको छ ।
