अबको राष्ट्रपति विद्या कि झलनाथ ?बाहिरियो फेरी रहस्य

काठमाडौं, २४ माघ । नयाँ सरकार गठनको पूर्वसन्ध्यामा वाम गठबन्धन जुटिरहेको छ । यो बीचमा वाम गठबन्धनमा राष्ट्रपति कसलाई बनाउने भन्ने विषयमा विवाद उत्पन्न भएको खुलासा भएको छ ।

एमाले र माओवादी केन्द्रवीच भद्र सहमति भए अनुसार प्रधानमन्त्री र राष्ट्रपति एमालेलाई दिने र उपराष्ट्रपति र सभामुख माओवादीलाई दिने भनिएको छ । सो अनुसार प्रधानमन्त्रीमा एमाले अध्यक्ष केपी शर्मा ओली बन्ने निश्चित भैसकेको छ । तर राष्ट्रपतिमा ओलीको चाहना अहिलेकै राष्ट्रपति विद्यादेवी भण्डारीलाई दोहोर्याउने छ । उता बरिष्ठ नेता झलनाथ खनाल र माधव कुमार नेपाल भने एउटै व्यक्तिलाई दोहोर्याउन नहुने अडानमा देखिएका छन् ।

स्वयम् खनालले आफूलाई पार्टीले जिम्मेवारी दिए उक्त जिम्मेवारी गहन रुपमा निभाउन आफू तयार रहेको सार्वजनिक रुपमै बताउँदै आएका छन् । खनालले राष्ट्रपतिमा ईच्छा व्यक्त गरेका छन् । तर ओली र महासचिव ईश्वर पोखरेल भण्डारीलाई नै दोहोर्याउनुपर्ने अडानमा उत्रिएका छन्।

यता खनाल–नेपाल समूहका नेता एवम् उपाध्यक्ष युवराज ज्ञवालीले पत्रकार ऋषि धलासँगको कुराकानीमा नयाँ राष्ट्रपतिमा खनाल उपर्युक्त व्यक्ति भएकोले यसमा कुनै विवाद गर्न नहुने धारणा राखे । उनले भने,‘खनाल हाई–प्रोफाईल व्यक्ति हुनुहुन्छ, उहाँ प्रधानमन्त्री भैसक्नुभयो, अध्यक्ष भैसक्नुभयो।’

उनले अब बस्ने स्थायी समिति बैठकमा यसबारेमा छलफल हुने भन्दै सर्वसम्मत् रुपमा खनाललाई नै अबको राष्ट्रपति बनाउनेगरि निर्णय गरिने जनाए ।
तर ओली खेमाका नेता एवम् सचिव प्रदिप ज्ञवालीले राष्ट्रपति कसलाई बनाउने भन्नेबारे छलफल हुनै बाँकी रहेको सुनाए । उनका अनुसार वर्तमान राष्ट्रपति भण्डारीलाई नै दोहोर्याउन पनि सकिने छ ।