चैत ३, काठमाण्डौ । नेपाल नेदरल्याण्ड्ससँग ४५ रनले पराजित भएको छ र विश्वकप छनोटमा आठौं भएको छ । एकदिवसीय मान्यता पाइसकेको नेपालका लागि सातौं स्थानका लागि भएको खेल प्रतिष्ठाको लडाइँ थियो । तर, ब्याटिङमासमस्या दोहोरिँदा हारका साथ प्रतियोगिता टुंग्यायो ।

१९० रनको लक्ष्य पछ्याएको नेपालले ४४.४ ओभरमा सबै विकेट गुमाएर १४४ रन मात्र बनाउन सक्यो । नेपालको ओपनिङ राम्रो रहेन । लगातार कमजोर प्रदर्शन गर्दै आएका उपकप्तान ओपनर ज्ञानेन्द्र मल्ल मात्र ४ रनमा आउट भए ।

थप २२ रन जोड्दा अर्का ओपनर अनिलकुमार साह पनि ८ रनमा आउट हुन पुगे । तेस्रो विकेटका रुपमा कप्तान पारस खड्का २२ रनमा आउट भए,जतिबेला नेपालले ५१ रन बनाएको थियो । थप ९ रन जोड्दा आरिफ शेख ५ रमा आउट भए भने रोहितकुमार पौडेलले खाता नै खोल्न सकेनन् ।

दिपेन्द्र सिंह ऐरी २५ रनमा पभेलियन फर्किए । सातौं विकेटका रुपमा शक्ति गौचन आउट हुँदा नेपालको स्कोर ७६ रन मात्र थियो । सोमपाल कामी र करण केसीले सातौं विकेटका लागि ३१ रनको साझेदारी गरे । तर, करण १३ रामा आउट हुन पुगे ।

राम्रो पारी खेल्ने प्रयासमा रहेका सोमपाल कामी नवौं विकेटका रुपमा ३६ रन बनाएर पभेलियन फर्किए । यसअघि टस जितेको ब्याटिङ रोजेको नेदरल्याण्ड्सले ५० ओभरमा ८ विकेट गुमाएर १८९ रन बनायो ।

नेपालका सोमपाल कामीले ४ विकेट लिए भने ललित नारायण राजवंशी र सन्दिप लामिछानेले २–२ विकेट हात पारे । प्रतियोगितामा पहिलो पटक मौका पाएका भेट्रान बलर शक्ति गौचनले १ विकेट आफ्नो नाममा लेखाएका छन् ।

विश्वकप छनौटमा कूल पाँच खेल खेलेको नेपालले जम्मा दुई खेल मात्रै जितेको छ । दुई खेल जित्दा मात्रै पनि एक दिवसिय मान्यता पाएकाले नेपाली क्रिकेटले सफलता हासिल गरेको भन्न सकिन्छ, तर समग्रमा नेपालको प्रदर्शन निराशाजनक देखियो ।

नेपालले समहु चरणमा हङकङ र प्लेअफमा पपुवा न्युगिनीलाई पराजित गरेको हो ।

समूह चरणमा लगातार तीन खेलमा पराजय बेहोरेपछि नेपालले  हङकङलाई ५ विकेटले पराजित गरेको थियो । त्यसअघि समूह बिको नेपाल पहिलो खेलमा टेष्ट नेशन राष्ट्र जिम्बावेसँग ११६ रन,दोस्रो खेलमा स्कटल्याण्डसँग ४ विकेट र तेस्रो खेलमा अफगानिस्तानसँग ६ विकेटले पराजित भएको थियो ।

छनोटमा नेपालको समूहबाट जिम्बावे,अफगानिस्तान र स्कटल्याण्डले सुपर सिक्समा स्थान पक्का गर्यो ।  यस्तै समूह ए बाट वेष्ट इण्डिज, आयरल्याण्ड र युएईले सुपर सिक्समा स्थान बनाउदै विश्वकप खेल्ने सपना कायम राख्न सफल भयो ।

यता, खराब प्रदर्शनकै कारण नेपालको सुपर सिक्स पुग्ने सपना समाप्त भएको थियो ।  पाँच टिममध्ये ३ टोलीले सुपर सिक्समा स्थान बनाउने समूह चरणमा नेपाल चौथो स्थानमा रह्यो । चौथो स्थानमा रहेर प्ले अफमा पुगेसँगै नेपालको एकदिवसीय विश्वकप खेल्ने सपना पुन केहि बर्ष पछाडी धकेलियो ।

यस्तै पपुवा न्युगिनी नवौं र हङकङले दशौं स्थानमा रहँदै प्रतियोगिताको अन्त्य गरेका छन् । नवौं स्थानको प्लेअफमा पीएनजीले हङकङलाई ५८ रनले पराजित गरेको हो ।