मल्टिस्टार ‘शत्रु गते’ शुक्रबार रिलिज भएको छ । चलचित्रले सोलो रिलिज हुने मौका पाएको छ । बलिउडमा पनि राम्रा चलचित्र नआएकाले ‘शत्रु गते’ लाई निकै फाइदा हुने देखिएको छ । चलचित्र रिलिज अगाडि नै मल्टिप्लेक्समा खुल्ला गरिएको बुकिङ राम्रो देखिएको छ । सार्वजनिक गीत तथा ट्रेलरको कारण प्रतिक्षित बनेको चलचित्र हेर्न दर्शकले चासो देखाएका छन् ।
मल्टिप्लेक्समा राम्रो शो पाएको छ । फिल्मले क्युएफएक्स च्यानलअन्तर्गतको हलमा २२ शो, बिग मुभिजमा ९ शो, एफक्युबमा ८ शो, सिने डी सेफमा १० शो, बिएसआर मुभिजमा ८ शो र क्युज सिनेमाजमा ७ शो पाएको छ । राजधानीका सिंगल हलमा पनि राम्रो शो पाएको छ । चलचित्रलाई प्रदीप भट्टराईले निर्देशन गरेका हुन् ।
फिल्मलाई मह सञ्चारको ब्यानरमा निर्माण गरिएको छ भने यसका प्रस्तुतकर्ता किरण केसी हुन् । फिल्ममा हरिवंश आचार्यको कथा रहेको छ । पटकथालाई निर्देशक भट्टराई र दीपकराज गिरी तथा संवाद भने निर्देशक भट्टराईले कथाकार हरिवंश आचार्यसंग मिलेर तयार गरेका हुन् ।
‘शत्रु गते’ मा मदनकृष्ण श्रेष्ठ, हरिवंश आचार्य, दीपकराज गिरी, दीपाश्री निरौला, प्रियंका कार्की, पल शाह, आँचल शर्मालगायतका चर्चित कलाकारहरूको अभिनय रहेको छ । चलचित्रका निर्देशक भट्टराईले ‘शत्रु गते’ मा तीन पुस्तालाई देखाउन खोजिएको बताए । स्टारडमभन्दा पनि क्यारेक्टरअनुसार चलचित्र बनाएको उनको भनाइ छ ।
