पुस १० गतेदेखि स्कुलबाट एकसाथ बेपत्ता भएका सुर्खेतका तीन बालिका बुटवलमा भेटिएका छन् । बालिकाहरुलाई आइतबार बुटवल बसपार्कमा प्रहरीले फेला पारेको हो ।
स्कुलको हाफटाइममा निस्किएका किशोरी घर नफर्के पछी परिवारले खोजीका लागि प्रहरीलाई निवेदन दिएका थिए । उनीहरुलाई सुर्खेत, नेपालगन्ज र बुटवलका प्रहरीले खोजी कार्य तीव्र पारेको थियो । यसैक्रममा इलाका प्रहरी कार्यालय बुटवलबाट खटिएको टोलीले तीनैजनालाई आज (आइतबार) बिहान बुटवल बसपार्कमा फेला पारेको हो ।
बालिकाहरुको साथमा एकजना अपरिचित व्यक्ति पनि थिए । बुटवल प्रहरीले भेटिएका बालिकाहरु र साथमा रहेका व्यक्तिलाई सुर्खेत पठाउने तयारी गरिरहेको छ ।
सिम्ता गाउँपालिकाको वडा नम्बर ५ आलीमा पर्ने श्री नेपाल राष्ट्रिय माध्यामिक विद्यालयमा पर्दै गरेका खानिखोलाका १४ वर्षीया बालिका निशा सिंह ठकुरी, सोही ठाउँ बस्ने एकै घरका दुई दिदी बहिनी १५ वर्षीया यमुना खत्री र १२वर्षीया रिचिमा खत्री सँगै बेपत्ता भएका थिए। यमुना र निशा कक्षा ९ मा छात्ता हुन् भने, रिचिमा कक्षा ७ की छात्रा हुन् ।
