‘जहाज खरीद र एनसेल कर छली भ्रष्टाचारमा वर्तमान सरकारको सङ्लग्नता’

काठमाडौँ, १२ माघ । प्रमुख प्रतिपक्षी दली नेपाली काङ्ग्रेसका वरिष्ठ नेता रामचन्द्र पौडेलले सरकार इतिहास मेटाउन सक्रिय रहेको गम्भिर आरोप लगाएका छन् ।

काङ्ग्रेसका पूर्वसभापति एवं पूर्वप्रधानमन्त्री गिरिजाप्रसाद कोइरालाको स्मृतिमा स्थापना भएको ‘जीपी कोइराला फाउण्डेशन ललितपुर शाखाको उद्घाटन तथा फोटो प्रदर्शन’ कार्यक्रममा नेता पौडेलले यस्तो आरोप लगाएका हुन् ।

उनले भने,“देशमा परिवर्तन ल्याउन गिरिजाप्रसाद कोइराला र सुशील कोइरालाको ठूलो भूमिका रहेको तर उहाँहरुकै इतिहास मेटाउन सरकार लागेको छ, यसका विरुद्ध काङ्ग्रेस आन्दोलनमा उत्रन्छ ।

नेता पौडेलले जहाज खरीद, एनसेल कर छलीलगायत विकास निर्माणमा भएका भ्रष्टाचारमा वर्तमान सरकारको सङ्लग्नता रहेको भन्दै त्यसविरुद्ध आन्दोलन गर्ने बताए ।