कर्मचारीको समायोजन सकिएको घोषणा, तीन तहमा १ लाख ३१ हजार कर्मचारी समायोजित

चैत १४, काठमाडौं । सरकारले संघीय संरचना अनुसार कर्मचारीको समायोजन सकिएको घोषणा गरेको छ। संघीय मामिला तथा सामान्य प्रशासन मन्त्रालयले संघ, प्रदेश र स्थानीय तीनै तहमा १ लाख ३७ हजार ६ सय १४ कर्मचारीको स्वीकृत दरबन्दी अनुरुप समायोजन प्रक्रिया सकिएको सहसचिव केदार प्रसाद पनेरुले जानकारी दिए ।

स्वास्थ्य, निजामती सहित सबै सेवाका कर्मचारीको समायोजन सकिएको घोषणा गरिएको हो। तर, उक्त घोषणा हुँदासम्म स्वास्थ्यका कर्मचारीको समायोजन सूची भने सार्वजनिक गरिएको छैन। मन्त्रालयका अनुसार स्वास्थ्यका सहित एक लाख ३१ हजार कर्मचारी समायोजन भएका छन् । जसमध्ये स्वास्थ्यका २७ हजार ३ सय २ जना कर्मचारी समायोजन भएका छन् ।

कर्मचारी समायोजनका क्रममा स्वास्थ्य सेवाका ६ सय ५७ जना कर्मचारी भने फाजिलमा परेका छन्। स्वास्थ्य सेवा अन्तर्गत स्थानीय तहमा २२ हजार १ सय ७६, प्रदेशमा २ हजार ३ सय ९४ र संघमा २ हजार ७५ जना कर्मचारी समायोजन भएका छन्।

कर्मचारी समायोजन गर्दा संघमा ३५, सात प्रदेशमा १६ र स्थानीय तहमा ४९ प्रतिशतका दरले समायोजन गरेको मन्त्रालयले जनाएको छ । जसअनुसार संघमा ४८ हजार ४ सय ९ कर्मचारी, सात प्रदेशमा २२ हजार २ सय ९७ र स्थानीय तहमा ६६ हजार ९ सय ८ कर्मचारी खटिने छन् ।