मनोज पराजुली, चैत्र १८, काठमाडौं । सन् २०१९ को कोरियाली भाषा परीक्षाका लागि ९२ हजार ३७६ जनाले आवेदन दिएका छन् । गत वर्षको भन्दा यो वर्ष १० हजार १ सय १२ ले बढीले आवेदन दिएका ईपीएस कोरिया शाखाले जानकारी दिएको छ । सन् २०१८ को भाषा परीक्षाका लागि ८२ हजार २ सय ६४ ले आवेदन फारम भरेका थिए ।
भाषा परीक्षाको लागि आवेदनसंगै परीक्षार्थीले २४ डलर बराबर नेपाली रुपैयाँ बुझाउनुपर्ने तोकिएको छ । यसका आधारमा हेर्ने हो भने यस पटक नेपालीको २१ करोड ७३ लाख ४० हजार ६ सय ४० रुपैया रकम परीक्षा आवेदन कै लागि खर्च गरेका छन् । नेपालमा प्रयाप्त रोजगारीका अवसर नहुँदा राम्रो कमाइ हुने आशामा कोटा भन्दा १० गुणा भन्दा धेरै संख्यामा आवेदन पर्ने गरेको छ।
फर्म भर्नका लागि मात्रै २१ करोड ७३ लाख ४० हजार ६ सय ४० रुपैया सकिएपनि कोरियन भाषा परीक्षाका लागि नेपालीले खर्च गरेको १९ करोड ८ लाख ८ हजार ६४० रकम खेर जाने भएको छ । यो रेकर्ड १० हजार ५० जनाले भाषा पास गर्ने आधारमा अन्यले आवेदन संगै बुझाएको रकमको आधारमा हो। यधपी १० हजार ५० जना कोरिया जान पाउने ग्यारेन्टी भने होइन ।भाषा सिक्नका लागि एक जनाले कम्तिमा पनि १० हजार भन्दा बढी रकम ट्युसन सेन्टरलाई तिर्ने गरेका छन् । यसको न्युनतम हिसाबको कुनै लेखाजोखा नै गर्ने गरिएको छैन ।
ईपीएस शाखाले चैत ८ देखि १७ गते अर्थात् आइतबार राति १२ बजेसम्मका लागि आवेदन फारम भर्न पाइने समयसीमा तोकेको थियो । यो ९ दिनको अवधिमा ९२ हजार ३७६ युवाले आवेदन दिएका वैदेशिक रोजगार ईपीएस शाखा कार्यालयले जानकारी दिएको छ । सन् २०१९ मा कोरियाले नेपाललाई १० हजार २ सय कामदारका लागि कोटा छुट्टयाएको छ जसमध्ये उत्पादनमूलक क्षेत्रका लागि ७ हजार ५० र कृषितर्फ ३ हजार १ सय ५० जना कामदार लैजाने छ ।
सन् १०१७ मा ६८ हजार ३ सय ८३ र सन् २०१६ मा ६० हजार ६ सय २६ जनाले भाषा परीक्षामा सहभागिता जनाएका थिए । २०१८ मा भाषा परीक्षा उत्तीर्ण गर्ने ७ हजार ९ सय ९६ जना कोरिया गइसकेका छन् । १० वर्षको अवधिमा कोरियाली भाषा परीक्षा मार्फत ५८ हजारभन्दा धेरै युवा रोजगारीका लागि कोरिया पुगेको इपिएस शाखाले जनाएको छ । दक्षिण कोरियाले रोजगार अनुमति प्रणाली (ईपीएस)अन्तर्गत सन् २००८ देखि नेपाली युवालाई आफ्नो देशमा रोजगारीको अवसर उपलब्ध गराउँदै आएको हो ।
एक व्यक्तिले एउटा क्षेत्रमा मात्रै आवेदन दिन पाउने व्यवस्था छ । जुन क्षेत्रका लागि परीक्षा आवेदन फारम भरेको हो भाषा परीक्षा उत्तीर्ण भएपछि त्यहि क्षेत्रमा मात्र रोजगार आवेदन फारम भर्न पाइनेछ । परीक्षाका लागि यसअघि २५ वटा पढेर उत्तर दिने र २५ वटा सुनेर उत्तर दिने गरी ५० वटा प्रश्न सोधिने गरेकोमा यस पटकबाट पढ्ने र सुन्ने प्रश्नको सङ्ख्या घटाएर २०/२० वटा बनाइएको छ । परीक्षामा उत्पादनमूलक क्षेत्र तर्फ ४७ दशमलव ५ वा त्योभन्दा धेरै र कृषि तर्फ ३६ अंक ल्याउनेहरुमध्ये धेरै उच्च अंक ल्याउनेहरुबाट छनौट हुनेछन् ।
भाषा परीक्षा आगामी जेठ २५ र २६ गते सञ्चालन हुने छ । नतिजा असार १३ गते प्रकाशित हुनेछ ।
