सगरमाथाको आधार शिविरमा योग

काठमाडौं, १ असार । सगरमाथाको आधार शिविरमा पर्वतारोहीले योगाभ्यास गरेका छन् । समुन्द्री सतहदेखि १७ हजार छ सय फिट उचाईमा रहेको सगरमाथाको आधार शिविरमा पहिलो पटक योग अभ्यास गर्दै योग दिवस मनाइएको हो ।

योगाभ्यासमा भारतको गुजरातका भरत शर्मासहितका पर्वतारोही सहभागी थिए । उनीहरुले सगरमाथाको आधार शिविरमा योग अभ्यास गरेर कीर्तिमान बनाएका छन् । यसैगरी, सगरमाथाको काखमा योग दिवस मनाइएको छ । विश्वको सर्वोच्च शिखरको प्रवेशद्वार नाम्चे बजारमा विशेष कार्यक्रमको आयोजना गरी योग दिवस मनाइएको हो ।

योग दिवसमा विभिन्न संघसंस्था तथा प्रतिष्ठित व्यक्तिहरु सहभागी थिए । स्थानीय महिला, युवा समूहका अलावा खुन्दे खानेपानी व्यवस्थापन समिति, खुम्जुङ र खुन्दे महिला तथा युवा समूह, सगरमाथा राष्ट्रिय निकुञ्जका पदाधिकारीका अलावा स्थानीय बासिन्दाको उत्साहजनक सहभागिता रहेको थियो । योग दिवसमा विदेशी पर्यटक, पर्वतारोही तथा अनुसन्धानकर्ता पनि सहभागी थिए ।

यसैगरी, काठमाडौं स्थित भारतीय राजदूतावासको आयोजनामा योग दिवस सप्ताहव्यापी रुपमा मनाइदैछ । २१ जुनमा पर्ने अन्तर्राष्ट्रिय योग दिवस अगाडि नै योग अभ्यासका कार्यक्रमहरु गरिएका छन् ।
आज भारतीय राजदूतावासको आयोजनामा योग दिवस मनाइएको छ । भारतीय राजदूत मञ्जिभ सिंह पुरीसहित दूतावासका कर्मचारी, प्रतिष्ठित व्यक्तित्वहरु योग अभ्यासमा सहभागी थिए ।

दैनिक जीवनमा योगको महत्व उजागर गर्दै देश, महादेश तथा समस्त मानव जीवनमा शान्ति तथा सामञ्जस्यता स्थापना गर्ने उद्देश्यले सगरमाथाको काखमा योग दिवस मनाइएको आयोजकले जनाएको छ ।