रबिन्द्र यादव / नवलपरासी पश्चिम उत्पादनशिलता बढाएर स्थानीय स्तरमै युवाहरूलाई स्वरोजगार बनाउने उदेश्यले प्रदेश नं ५ सरकारले ल्याएको मुख्यमन्त्री ग्रामीण विकास कार्यक्रम अनुसार नवलपरासी पश्चिमको दक्षिणी भेगको सुस्ता गाउँपालिकामा च्याउ खेती तर्फ युवा कृषकहरुको आकर्षण बढेको छ ।

प्रदेश सरकारले कृषि क्षेत्रको प्रबर्द्धनका साथै उत्पादकत्व वृद्धि गरि आय आर्जनमा युवा स्वरोजगारमुलक कार्यका लागि नीतिगत कार्यक्रम ल्याए पछि सुस्तामा च्याउ खेती आश लाग्दो आर्थिक उपार्जनको माध्यम देखिन थालेको हो । मुख्यमन्त्री ग्रामीण विकास प्रदेश नं ५ को आर्थिक सहयोग र सुस्ता गाउँपालिकाको प्राबिधिक सहयोग तथा सुस्ता नमुना च्याउ खेती समुह द्वारा थालिएको च्याउ खेती तर्फ युवा आकर्षित बनेका छन ।

मुख्यमन्त्री ग्रामीण विकास कार्यक्रमबाट च्याउको बीउ,प्रबिधी र आबश्यक सीपका लागि तालिम तथा प्राबिधिक सहयोगका साथै समुहलाई टनेल खेती अन्तर्गत ५ लाख सरकारी अनुदान पाए पछि सुस्ताका युवा च्याउ खेती तर्फ आकर्षित बनेको कार्यक्रमका जिल्ला संयोजक अमृता गैरले बताइन् ।

सरकारबाट युवा स्वरोजगार कार्यक्रम अनुसार बीउ,प्रबिधि र नगद अनुदान सहायता पाए पछि आर्थिक उपार्जनका निम्ति व्यावसायिक रुपमा च्याउ खेतिमा लागेको सुस्ता गापा -१ घर भएका र समुहका संयोजक समेत रहेका कृषक चिरञ्जीवी न्यौपानेले बताए । छोटो समयमा उत्पादन भइ आर्थिक उपार्जनको भर पर्दो माध्यमका रुपमा देखिएको च्याउको खेतीको बिस्तार आबश्यक रहेको कृषकहरू बताउछन् ।

च्याउ खेतीको बिस्तार प्रबर्द्धन ,अनुदान र प्रचारप्रसार गरि धेरै युवाहरूलाई सहभागी गराउन सरोकारवाला हरुको ध्यान जान सके स्थानीय आर्थिक समृद्धिको बिकल्पको पाटो बन्न सक्ने जानकारहरु बताउछन् । यस अघि देखि आर्थिक उपार्जनका लागि मौसमी तथा बेमौसमी तरकारीको व्यावसायिक खेती बाट मनग्य आमदानी गर्दै आएका सुस्ताका कृषक अहिले च्याउ खेती तर्फ आकर्षित हुँदै आएका छन् ।

अहिले सुरुवातको चरणमा रहेको च्याउ खेतीमा कन्नेए प्रजातीका १ सय पचास च्याउको बल राखिएको छ भने मौसम अनुसार भविष्यमा भारतको दक्षिणी प्रान्तमा पाइने मिल्की प्रजातीका च्याउ लगाइने छ । उक्त समुहमा ढाइ सय च्याउको बल राख्न सक्ने क्षमता समेत रहेको बताइएको छ । यसको बजारिकरणको लागि सुरुमा स्तानिय स्तरमा त्यसपछि परासी ,बुटवल , कावासोती,नारायणगढ लगायतको बजार रहने समुहका संयोजक न्यौपानेले बताए ।

नवलपरासी पश्चिमको सात स्थानिय तह मध्ये पाल्हिनन्दन, प्रतापपुर , सुस्ता र सरावल गाउँपालिकामा मुख्यमन्त्री ग्रामीण विकास कार्यक्रम संचालित छ । अार्थिक बर्ष ०७५/०७६ मा सुस्ता गाउँपालिका लाई प्रदेश सरकारले कार्यक्रम अन्तर्गत ४५ लाख दिएको हो ।