आइजीपी खनाल आइएसआइको तारोमा

काठमाडौँ । नेपाल प्रहरीका आइजीपी सर्वेन्द्र खनालले थाइल्यान्डमा भएको सुरक्षा सम्मेलनमा भारतीय प्रधानमन्त्रीका सुरक्षा सल्लाहकार अजीत दोभालसँग हात मिलाएर आतंकवादविरुद्ध ऐक्यवद्धता जनाएको विषयले उनीमाथि अन्तर्राष्ट्रिय चुनौती बढाएको थियो । यस विषयलाई लिएर पाकिस्तानले आइजीपी हटाउने उद्देश्यका लागि कुटनीतिक माध्यमले लबिङ मात्र गरेन आफ्नो नेपालभित्र र बाहिरको संयन्त्रलाई समेत सक्रिय बनायो । अवस्था यतिसम्म बन्यो कि खनाल पाकिस्तानी खुफिया एजेन्सी आइएसआइको तारो बनेका छन् ।

रिपोर्टर्स नेपाललाई प्राप्त विशेष सूचना अनुसार आइजीपी सर्वेन्द्र खनालविरुद्ध पाकिस्तानको खुफिया एजेन्सी आइएसआई विगत एक वर्षयता सक्रिय हुँदै आएको थियो । दोभालसँग आइजीपी खनालको हातेमालो पछि उसले बलियो रणनीति नै बनाएर लाग्यो । त्यही योजना अनुसार आइजीपीविरुद्ध दुष्प्रचार गर्न टोली परिचालन गरियो । प्रहरीभित्र नै उनीविरुद्ध घेराबन्दी गर्ने गरी षड्यन्त्र बुनियो । कतिपय षड्यन्त्रहरु विफल बनाइए । कतिपयले सरकारमा रहेकाहरुसम्ममा गलत सूचना पुग्दा आइजीपी हटाउने खेलसम्म भए ।

गत वर्ष एउटा ठूलो हत्याकाण्डको षड्यन्त्र बुनियो । निर्मला हत्याकाण्ड भएर देशको ध्यान कञ्चनपुरतर्फ हुँदा काठमाडौंमा एकजना वरिष्ठ पत्रकारको हत्या गर्ने षड्यन्त्र भयो । जसमा प्रहरीका केही अधिकृतहरु समेत संलग्न भएको प्रमाण फेला पर्यो । त्यसको अडियो र भिडियो फुटेजहरु रिपोर्टर्स नेपालसँग सुरक्षित छ जुन सुरक्षा संवेदनशीलतालाई मध्यनजर गरेर सार्वजनिक नगरिएको हो ।

भिडियो फुटेजमा कन्ट्रयाक्ट किलरले एकजना प्रहरी अधिकृतको इशारामा एकजना वरिष्ठ पत्रकारको हत्याको योजना खुलाएका छन् । जसमा प्रहरीभित्रको एउटा टोली संलग्न छ । यसमा बाह्य शक्तिको समेत संलग्नता देखिएको छ ।

प्रहरी संगठनभित्र लोकप्रीय बनेका आइजीपी खनाललाई कुनै हालतमा हटाउन पाकिस्तानले समेत संलग्न हुनुमा नेपाली भूमि प्रयोग गरेर छिमेकविरुद्ध गतिविधि गर्ने मौका नपाउनु मुख्य कारण देखिएको छ । खनालले आफ्नो कार्यकालमा छिमेकविरुद्ध हुने गतिविधिमा कुनै मौका नदिने रणनीति बनाए । त्यसले सबैभन्दा बढी अन्तर्राष्ट्रिय आतंकवादी संगठन संचालन गर्नेहरुलाई पर्यो । त्यसमाथि थाइल्यान्डमा अजित दोभालसँगको हातेमालो र आतंकवादविरुद्ध ऐक्यवद्धता पाकिस्तानका लागि असह्य भयो । विश्वकै खतरनाक मध्येको उसको खुफिया एजेन्सी आइएसआईको प्रयोग आइजीपी खनालमाथि हुनुमा दोभालसँगको हातेमालो पनि एउटा कारण बन्यो । भारतका काश्मिरलगायतका महत्वपूर्ण कदम चाल्न दोभालले महत्वपूर्ण भूमिका निभाउँदै आएका छन् ।

आइजीपी खनाललाई पदबाट बर्खास्त गराउने माहोल बनाउन आइएसआईको योजनावद्ध षड्यन्त्र एकपछि अर्को गर्दै विफल भएपछि धेरै षड्यन्त्रहरु बाहिर आउन थालेका छन् । सरकारका जिम्मेवार अधिकारीहरु सम्म यसका प्रमाणहरु पुगेका छन् । कतिपय व्यक्तिहरु आइएसआईबाट दुरुपयोग भएको विषय चर्चामा आउन थालेको छ । बाहिर जे जस्ता प्रोपोगान्डा मच्चिएपनि आइजीपी हटाउने स्वार्थ पाकिस्तानको खुफिया एजेन्सीको रहेको खुल्दै गएको छ । यसले सुरक्षा निकायसम्म म्यानुपुलेसनको विषयबारे चर्चा हुनथालेको छ ।

रिपोर्टर्स नेपाल खोज