काठमाडौँ | प्रख्यात बाबा रामदेवको कम्पनी पतन्जलीले कोरोनाको औषधि बनाएको दावी गर्दै मंगलबार औषधि सार्वजनिक गरेको छ । पतंजलीले औषधि सार्वजनिक गर्ने क्रममा उक्त औषधि कोरोना संक्रमितहरुमा समेत परीक्षण गरिएको दावी गरिएको छ । उक्त विषयलाई लिएर भारतभर यसैको चर्चा चुलिएको छ । भारतमा रामदेवले मंगलबार सार्वजनिक गरेको औषधिले कोरोनाको सतप्रतिशत उपचार गरेको दावीको विषयलाई लिएर समाचार बनाइदा यसको जवाफ पतंजलीले दिनुपर्ने भएको छ । पतंजलीलाई मोदी सरकारले परीक्षण गरिएको विवरण सार्वजनिक गर्न निर्देशन दिएको छ ।
जडीबुटीबाट बनाइएको दावी गरिएको औषधिको नाम कोरोनिल राखिएको छ । सोमबार हरिद्वारमा एक कार्यक्रम गरी रामदवले यो औषधि सार्वजनिक गरेका हुन् । यो औषधि दिल्लीलगायत भारतका कैयौं सहरमा कोरोना संक्रमण भएका २ सय ८० बिरामीमा परीक्षण गरिएको र यस क्रममा शतप्रतिशत बिरामी निको भएको रामदेवको दाबी छ । सोहि दावीलाई लिएर सम्बन्धित मन्त्रालयले परीक्षणको विवरण बुझाउन निर्देशन दिएको छ ।
रामदेवको दावी अनुसार औषधिको प्रयोगबाट ३ देखि १४ दिनसम्म कोरोनाका सबै लक्षण निको पारिएको थियो । दावी अनुसार दोस्रो चरणमा क्लिनिकल नियन्त्रण परीक्षण गरिएको थियो । यसमा सय मानिस सहभागी गराइएको थियो । यस चरणमा ३ दिनमा ६९ प्रतिशत बिरामी निको भएको उनको दाबी छ । औषधि बनाउने क्रममा सबै वैज्ञानिक नियम पालना गरिएको दाबी रामदेवको छ । मुलेठी, अश्वगन्धा, तुलसीलगायत जडीबुटी मिश्रण गरी यो औषधि बनाएको रामदेवको भनाइ छ ।
औषधि सार्वजनिक गर्ने क्रममा रामदेवले ७ दिनमा सबै परीक्षण गरिएका बिरामीहरु निको भएको दावी समेत गरेका छन् । उनले दावी गर्दै भनेका छन् कि ‘हाम्रो औषधिले १०० प्रतिशत विरामी निको हुन्छन् मृत्युदर सुन्य छ ।’
मन्त्रालयको ध्यानाकर्षण
भारतस्थित आयुष मन्त्रालयले रामदेवको पतंजलीले कोरोनाको औषधिको रुपमा सार्वजनिक गरिएको उक्त औषधिको विषयमा ध्यानाकर्षण गरेको छ । उक्त मन्त्रालयले कम्पनीको तर्फबाट दावी गरिएअनुसार सत्यता र वैज्ञानिक अध्ययनलाई लिएर मन्त्रालयमा कुनै जानकारी नगराइएको भन्दै यथासक्य जानकारी दिन निर्देशन दिएको छ । उक्त मन्त्रालयले भनेको छ ‘कोरोनाको १०० प्रतिशत उपचार हुने भन्दै प्रचार गरी औषधि सार्वजनिक हुनु, ड्रग्स एन्ड म्याजिक रेमेडीज (आपत्तिजनक विज्ञापन) कानून 1954 को उल्लंघन हो ।’
मन्त्रालयले पतन्जलिलाई निर्देशन दिदै कोरोना निको बनाइएको र अध्ययन गरिएको नमूनाको आकार, स्थान र अस्पताल विवरणबारे विस्तृत जानकारी दिन भनेको छ । भारतीय केन्द्र सरकारले यसै सम्बन्ध गजट नोटिफिकेशन पनि जारी गरेको छ र भनेको छ कि औषधिको अध्ययनलाई लिएर जे जानकारी छ त्यो सरकारले हेर्नेछ । मन्त्रालयले परीक्षणको जानकारी दिन र हाललाई उक्त औषधिको विज्ञापन गर्न रोक लगाएको छ ।
सरकारको निर्देशनसंगै पतंजलीले उक्त औषधि परीक्षण गरिएको विरामी तथा अस्पताल विवरण र नमुना परीक्षणको वैज्ञानिक दावीलाइ सावित गर्नुपर्ने चुनौती रहेको छ । २८० जना कोरोना संक्रमितमा उक्त औषधि परीक्षण गर्दा सबैलाई निको बनाएको दावी गरुएकोले सोको पुष्टि गर्नुपर्ने माग गरिएको छ ।
