आइतबार बिहान संघीय संसद्का महासचिव डा. भरतराज गाैतमले सूचना प्रकाशित गरी गृहमन्त्री थापाको राष्ट्रिय सभा सदस्य पद खारेज भएको जनाएका छन्।
संघीय संसद्को सूचनामा भनिएको छ, “नेपालको संविधानको धारा ८९ को खण्ड (ङ) बमोजिम राष्ट्रिय सभा सदस्य माननीय रामबहादुर थापा मगरको पद रिक्त हुन आएकाले राजनीतिक दलसम्बन्धी ऐन २०७५ को दफा ३५ को उपदफा (२) तथा राष्ट्रिय सभा नियमावली २०७५ को नियम १८६ को उपनियम (२) बमोजिम राष्ट्रिय सभाका सम्मानीय अध्यक्षबाट स्वीकृत भए बमोजिम यो सूचना प्रकाशित गरिएको छ।”
नेकपा (एमाले) र नेकपा (माओवादी केन्द्र) ब्युँतिएपछि गृहमन्त्री थापा एमालेमा प्रवेश गरेका थिए। प्रधानमन्त्री एवं एमाले अध्यक्ष केपी शर्मा ओलीले थापालाई एमाले केन्द्रीय सदस्यमा मनोनीत गरेका थिए।
त्यसपछि माओवादीले उनको सांसद पद खारेजीका लागि संसद् सचिवालयलाई सिफारिश गरेको थियो। राष्ट्रिय सभामा माओवादी संसदीय दलका नेता दीनानाथ शर्माले पठाएको पत्रका आधारमा राष्ट्रिय सभा अध्यक्ष गणेशप्रसाद तिमिल्सिनाले थापाको सांसद पद रिक्त भएको निर्णय गरेका हुन्।
गृहमन्त्री थापा बागमती प्रदेशबाट राष्ट्रिय सभामा निर्वाचित भएका थिए। सांसद पद गएसँगै उनी गृहमन्त्रीबाट पनि हटेका छन्।
