यी २० जिल्लामा फाइजर खोप लगाइँदै, १२ देखि १७ वर्षका बालबालिकालाई लगाइने

काठमाडौं । स्वास्थ्य तथा जनसंख्या मन्त्रालयले देशका विभिन्न २० जिल्लामा कोरोना भाइरसविरुद्धको फाइजर खोप लगाउने भएको छ । मन्त्रालयले मोडर्ना खोप लगाइने ५७ वटा जिल्ला बाहेकका २० जिल्लामा फाइजर खोप लगाउने निर्णय गरेको हो ।

फाइजर खोप १२ देखि १७ वर्षसम्मका बालबालिकालाई लगाइने छ । मन्त्रालयले यसअघि १२ वर्षमाथिका दीर्घ रोगीका लागि फाइजर खोप अभियान १९ जिल्लामा चलाएको थियो । ती १९ जिल्ला र सिन्धुली गरी २० जिल्लामा फाइजर खोप अभियान सुरु हुन लागेको हो ।

फाइजर खोप अभियान पहिला ८ वटा जिल्लामा पुस १३ देखि २२ गतेसम्म सञ्चालन हुनेछ । यो अवधिमा पहिलो मात्रा फाइजर खोप लगाइने र माघ ४ देखि १३ गतेसम्म दोस्रो मात्रा दिइने मन्त्रालयले जनाएको छ ।