प्रदेश र प्रतिनिधिसभा चुनाव मंसिरमा नै हुन्छः प्रचण्ड

जानकारी केन्द्र । नेकपा माओवादी केन्द्रका अध्यक्ष पुष्पकमल दाहाल ‘प्रचण्ड’ले प्रदेश सभा र प्रतिनिधि सभा निर्वाचन मंसिरमा हुने दाबी गरेका छन् ।

बर्दिया पुगेका उनले आज बेलभारमा पत्रकारहरुसँग कुरा गर्दै मंसिरको पहिलो हप्तामा हुने सम्भावना बढी भएको बताए । उनले भने, ‘प्रतिपक्षको पनि मंसिरको पहिलो हप्ता वा कात्तिकको अन्तिममा नै निर्वाचन गर्नुपर्छ भन्ने कुरा भएको छ । प्रधानमन्त्री लगायत गठबन्धनमा हामीले छलफल गर्दा मंसिरको पहिलो हप्तामा हुने नै बढी सम्भावना छ । त्यसकारण हामी कोही पनि कन्फ्युजन हुन पर्दैन, चुनाव मंसिरमा हुन्छ ।’

यसैगरी, चुनाव एकै चरणमा सम्पन्न गर्ने बारे यस्तो बताए ‘चुनाव दुई चरणमा हुन्छ कि एक चरणमा भन्ने पनि छलफल छ । तर जसरी स्थानीय तहको निर्वाचन एकै चरणमा देशैभरी सम्पन्न गर्न सम्भव भयो त्योभन्दा त प्रदेश र संघको पनि सहज हुन्छ । त्यसकारण एकैचोटी गर्ने कि भन्ने पनि छलफल छ ।’