विभिन्न पार्टिका थरूहट नेता र अधिकारकर्मी रेशम चौधरीको पार्टीमा संगठित हुँदै

काठमाडौं । मधेसवादी दललगायत विभिन्न दलमा आवद्ध थरूहटका नेताहरु रेशम चौधरीद्वारा गठित नागरिक उन्मुक्ति पार्टीमा संगठित हुन थालेका छन् ।

उन्मुक्ति पार्टीले आज आयोजना गर्ने कार्यक्रममा थरूहट आन्दोलनका अगुवा सुरेन्द्र चौधरी, लक्ष्मण थारु लगायतले पार्टी प्रवेश गर्ने जनाइएको छ । साथै, माओवादी केन्द्रका सीताराम थारु, काँग्रेसका राधेश्याम चौधरी, जसपाका मोहनलाल चौधरी, रकामकुमार थारु, प्रभा चौधरी, रञ्जित चौधरी, नेपाल लोकतान्त्रिक पार्टीका जग्गनाथ चौधरी, पार्वती चौधरीलगायतका नेताहरु पनि पार्टी प्रवेश गर्न लागेका छन् ।

यसैगरी, थरूहट आन्दोलनका अगुवा तथा अधिकारकर्मी ओमप्रकाश चौधरी, वासुदेव चौधरी, मनोज लोहार, इन्दु चौधरी लगायत पश्चिमका थुप्रै थारुहरु उन्मुक्ति पार्टीमा प्रवेश गर्ने जनाइएको छ ।

उक्त पार्टीमा थारु मात्र नभई देशभरका उत्पीडित समुदाय आवद्ध हुने जनाइएको छ । स्थानीय चुनावमा राम्रो नतिजा ल्याएको यो नयाँ पार्टीले धेरैलाई आकर्षण गरेको देखिन्छ । तत्कालिन राजपाबाट प्रतिनिधिसभा चुनाव जितेका रेशम चौधरी थुनामै भए पनि श्रीमतीको संयोजकत्वले पार्टी गठन गर्न सफल भएका थिए ।