जसपाले मन्त्री फिर्ता बोलाउँदै, बाबुराम भट्टराईलाई कारबाही गर्ने संकेत

काठमाडौं । जनता समाजवादी पार्टी (जसपा)ले सरकारमा रहेका चारै जना मन्त्रीलाई फिर्ता बोलाएर अरु सांसदलाई सरकारमा पठाउने जनाएको छ ।

उक्त निर्णय भएको कार्यकारिणी बैठक गएराती अबेर सकिएको थियो । त्यस्तै, सहभागी नेता मृगेन्द्र कुमार सिंह यादवले मन्त्री फेर्ने निर्णय पहिलाकै रहेको र हिजो कार्यान्वयनको विषय उठेको बताए ।

अध्यक्ष उपेन्द्र यादवले मन्त्री फेर्ने र नयाँ मन्त्री छान्ने जिम्मा पाएका छन् । साथै, बैठकमा पार्टीका संघीय परिषद् अध्यक्ष डा. बाबुराम भट्टराई, कृषिमन्त्री रहेका महिन्द्र राय यादवलगायत केही नेतालाई कारबाही गर्ने निर्णय गरेको छ ।

राष्ट्रियसभा सदस्य यादवले अध्यक्ष उपेन्द्र यादवविरुद्ध हस्ताक्षर अभियान चलाएको सुनिएको र समाचार तथ्यपरक भए त्यो पार्टी निर्णय विपरीत हुने भएकाले कारबाही गर्ने जनाइएको छ । जसपामा प्रदीप यादव, रामबाबु कुमार यादव, प्रमोद साह, सुरेन्द्र कुमार यादव र अमृता अग्रहरी लगायत मन्त्रीको दौडमा छन् ।

नेकपा एकीकृत समाजवादीको मन्त्री हेरफेर निर्णयपछि गठबन्धनका अन्य दलमा पनि मन्त्री हेरफेरको दबाब बढेको हो ।