मेयर हर्क साम्पाङले आफू चढ्ने गाडी बेचेर खाल्डा टाल्न रोलर किन्ने

काठमाडौं । धरान उपमहानगरपालिकाका मेयर हर्क साम्पाङले आफू चढ्ने गाडी बेचेर रोलर किन्ने घोषणा गरेका छन् ।

उपमहानगरपालिकाले मेयरका लागि किनेको गाडी बेचेर सडकका खाल्डा टाल्न रोलर किन्न लागिएको उनले सामाजिक सञ्जाल फेसबुकमार्फत जनाएका हुन् ।

मेयरको लागि भनी स्कर्पियो गाडी किनिएको थियो । बिहीबार बसेको कार्यपालिका बैठकले उनको गाडी बेचेर रोलर किन्ने प्रस्तावलाई ताली बजाएर अनुमोदन गरेको छ ।

उनले फेसबुकमा लेखेका छन्, ‘मेयरलाई भनेर किनिएको स्कोर्पियो गाडी बेचेर धरानको बाटो भरिका खाल्डा टाल्न यो रोलर मेसिन किन्ने विचार छ मेरो । आज कार्यपालिकाले ताली बजाएर अनुमोदन समेत गरिदेको छ । जय धरान ।’