काठमाडौं । नेपाल पर्यटन बोर्डले अष्ट्रेलियन राजदूतावाससँगको सहकार्यमा दुईतर्फी पर्यटन प्रवर्द्धनका लागि सहकार्य गर्न लागेको छ ।
सोमबार बोर्डका कार्यकारी प्रमुख (सिइओ) डा. धनन्जय रेग्मी र नेपालका लागि अष्ट्रेलियन राजदूतावास नियोग उपप्रमुख पल म्याकिकर्नबीचको भेटमा दुवै देशको पर्यटन प्रवर्द्धन गर्न आपसी सहकार्य गर्न सकिने विषयमा छलफल भएको छ । बोर्डले वार्तामा आर्थिक तथा पर्यटन कूटनीतिकका माध्यमबाट दुवै देशले फाइदा लिन सक्ने कुरामा जोड दिइएको जनाएको छ ।
बोर्डका सिइओ डा. रेग्मीले कोरोनापछि नेपालको पर्यटन क्षेत्र लयमा फर्किन थालेको बताउँदै साहसिक पर्यटनमा रुचि राख्ने अष्ट्रेलियन पर्यटकका लागि नेपाल एक आकर्षक गन्तव्य भएको उल्लेख गरे । उनले अष्ट्रेलिया र नेपालबीच सिधा हवाई कनेक्टिभिटी नभएका कारण पर्यटक कम आएको र हवाई कनेक्टिभिटी बढाउन दूतावासमार्फत पहल गर्न आग्रह गरे ।
नेपालका अष्ट्रेलियन राजदूतावास नियोग उपप्रमुख पल म्याकिकर्नले नेपालको विकासका लागि पर्यटन महत्वपूर्ण क्षेत्र रहेको उल्लेख गर्दै आपसी सहकार्यका लागि दूतावास तयार रहेको बताए । त्यस्तै, अष्ट्रेलियामा नेपाली समुदायहरूको संख्या बढिरहेको हुँदा कूटनीतिक तथा जनस्तरबाट समेत दुई देशबीचको सम्बन्धलाई थप अघि बढाउनु पर्नेमा म्याकिकर्नले जोड दिएका छन् ।
