नर्भिक अस्पतालले हडपेको सरकारी जग्गा खालि गराउँदै दुई मन्त्री

काठमाडौं । काठमाडौं महानगरपालिका वडा नम्बर ११ थापाथलीस्थित नर्भिक अन्तर्राष्ट्रिय अस्पतालले अनधिकृत हडपेको सरकारी जग्गा खाली गराउन दुई मन्त्री लागि परेका छन् । यही क्षेत्रबाट निर्वाचित बागमती प्रदेशको संस्कृति तथा पर्यटनमन्त्री दिपेन्द्र श्रेष्ठ र संघीय भूमि व्यवस्था, सहकारी तथा गरिबी निवारणमन्त्री शशी श्रेष्ठबीच नर्भिकले हडपिएको सरकारी जग्गा फिर्ता ल्याउने बारे छलफल भएको छ ।

नर्भिक अस्पताल गत २० वर्षदेखि वसन्त चौधरीलगायतको स्वामित्वमा रहेको छ । पर्यटनमन्त्री दिपेन्द्र श्रेष्ठले उक्त सरकारी जग्गामा डोजर चलाउन भूमि व्यवस्थामन्त्री शशी श्रेष्ठलाई ध्यानाकर्षण गराएका छन् । पर्यटनमन्त्री श्रेष्ठले मालपोत र स्थानीय तहले रेखाङ्कन गरिदिए आफ्नै नेतृत्वमा नर्भिकले हडपेको सरकारी जग्गा खाली गराउने बताए । नर्भिकले हडपेको उक्त जग्गामा स्वास्थ्य पार्क बनाउने श्रेष्ठको योजना छ ।

भूमि व्यवस्थामन्त्री शशी श्रेष्ठले पनि छलफलको क्रममा उक्त जग्गा संरक्षण गर्ने आफ्नो मुख्य एजेण्डा रहेको र यसलाई फिर्ता ल्याउन विशेष भूमिका खेल्ने जनाएकी छन् । उक्त १ रोपनी ८ आना १ पैसा १ दाम जग्गा नर्भिक अस्पतालले अनधिकृत भाडामा हत्याएको पाइएको छ । मन्त्रिपरिषद्को निर्णयपछि मात्र सरकारी जग्गाहरु भाडामा लिन सकिन्छ । तर नर्भिक अस्पतालले उक्त जग्गा भूमिसुधार अधिकारी लुम्बप्रसाद शिवाकोटीसँगको मिलेमतोमा अनधिकृत रुपमा भाडामा लिने सम्झौता गरेको खुलेको छ ।

अख्तियारको दुरुपयोग गर्दै तत्कालीन भूमिसुधार अधिकारी शिवाकोटीले मिलोमतोमा ‘प्राइम लोकेसन’को डेढ रोपनी सरकारी जग्गा नर्भिक अस्पताललाई भाडामा दिने सम्झौता गरेको देखिन्छ । भूमि व्यवस्थापन विभागका अधिकारीहरू आर्थिक चलखेल आधारमा यस्तो बदमासी भएको हुन सक्ने बताउँछन् । भूमि व्यवस्थामन्त्री शशी श्रेष्ठले यसबारे छानबिन गरिने र दोषीलाई कारबाही गरिने जनाएकी छन् ।