प्लाष्टिकको झोलामा लगाइएको प्रतिबन्धमा कडाइ गर्ने तयारी

काठमाडौं । सरकारले प्लाष्टिकको झोला उत्पादन र प्रयोग नियन्त्रण गर्न कडाइ गर्ने जनाएको छ छ ।

वातावरण विभागले प्रतिबन्ध लगाएको १ वर्ष पुग्न लाग्दा पनि नियन्त्रण नभएको भन्दै उत्पादन, आयात, प्रयोग र बिक्रीमा कडाइ गर्ने जानकारी दिएको छ ।

जारी भएको विभागको सार्वजनिक सूचना अनुसार नियन्त्रणका लागि कडाइका साथ अनुगमन गरिने र कारबाही प्रक्रिया अघि बढाइनेछ । विभागले प्रतिबन्धित झोला प्रयोग गरेको पाइएमा वातावरण संरक्षण ऐन र नियमावली अनुसार कारबाही गर्ने चेतावनी दिएको छ ।

त्यतै, २०७८ असोज १९ गते प्लाष्टिक झोलामा प्रतिबन्ध लगाइएको थियो । साथै, मन्त्रिपरिषद्को माघ १७ गतेको बैठकले प्लाष्टिक झोला प्रतिबन्धसम्बन्धी कार्ययोजना स्वीकृत गरी कार्यान्वयन गराएको थियो । जसकारण, वातावरणमा प्रतिकूल असर गर्ने ४० माइक्रोनभन्दा पातलो प्लाष्टिक झोला उत्पादन र प्रयोग गर्न पाइँदैन ।

यद्यपी, विभागले प्लाष्टिक झोलामा प्रतिबन्ध लगाए पनि कोरोना महामारीलगायत कारणले गर्दा प्रभावकारी अनुगमन नभएर प्रयोग झनै बढिरहेको जनाएको छ ।