आर्थिक संकटको सम्भावना टरेको छ– प्रधानमन्त्री प्रचण्ड

काठमाडौं । प्रधानमन्त्री पुष्पकमल दाहाल ‘प्रचण्ड’ ले नेपालमा आर्थिक संकटको सम्भावना टरेको बताएका छन् । आज ९आइतबार० नेपाल निर्माण व्यवसायी महासंघको २४औं साधारणसभालाई सम्बोधन गर्दै प्रधानमन्त्री प्रचण्डले देशको अर्थतन्त्र सजिलो अवस्थामा नभए पनि आत्तिहाल्नु पर्ने अवस्थामा नभएको बताएका हुन् । गत वर्ष हामीसँग वैदेशिक मुद्रा सञ्चितिमा ह्रास आउँदा मुलुकमा आर्थिक संकट पर्ने र देशको स्वाधीनता र अस्तित्व संकटमा जाने परिस्थिति बनेको स्मरण गर्दै प्रधानमन्त्री प्रचण्डले तात्कालीन सरकारले लिएको नीतिका कारण सम्भावित संकट टरेको बताए ।

‘देशको अर्थतन्त्र अहिले पनि सजिलो अवस्थामा छैन । तर आत्तिइहाल्नुपर्ने परिस्थिति पनि छैन । गत वर्ष हामीसँग वैदेशिक मुद्रा सञ्चितिमा ह्रास आउँदा कतै मुलुक आर्थिक संकटमा परिहाल्ने हो कि, त्यसले सिंगो देशको स्वाधीनता र अस्तित्व संकटमा पर्ने हो कि भन्नेजस्तो परिस्थिति विद्यमान थियो । तर बाह्य क्षेत्र सन्तुलनमा राख्न तात्कालीन अवस्थामा सरकारले लिएका नीतिहरूका कारणले गर्दा त्यस्तो संकटको सम्भावना टरेको छ,’– उनले भने ।

छिमेकी केही मुलुकहरुमा वैदेशिक मुद्राको घट्दो सञ्चितिले अर्थतन्त्र कमजोर बनेको अवस्थामा पनि नेपालमा १० महिनाभन्दा बढीको वस्तु तथा सेवा आयात धान्ने सञ्चिति रहेको उनले बताए । अहिले नेपालको अर्थतन्त्र क्रमश सुधारोन्मुख अवस्थामा रहेको उनको दाबी छ ।

‘हाम्रै छिमेकका केही मुलुकहरू वैदेशिक मुद्राको घट्दो सञ्चितिबाट आर्थिक रूपले कठिन अवस्थामा परेको बेला हामीसँग १० महिनाभन्दा बढीको वस्तु तथा सेवा आयात धान्ने सञ्चिति रहेको छ । यसले हाम्रो अर्थतन्त्र संकटबाट क्रमशः सुधारतर्फ अग्रसर भइरहेको देखाउँछ,’– उनले भने ।