काठमाडौं । संस्कृति, पर्यटन तथा नागरिक उड्डयन मन्त्री सुदन किरातीको कार्यसम्पादनलाई लिएर प्रधानमन्त्री पुष्पकमल दाहाल ‘प्रचण्ड’ ले खुसी व्यक्त गरेका छन् । मन्त्री किराती निकट स्रोतका अनुसार प्रधानमन्त्री प्रचण्डले मन्त्री किरातीको कार्यसम्पादनलाई नजिकबाट नियालिरहेका छन् । स्रोतका अनुसार मन्त्री किरातीबीच पछिल्लो पटकको भेटमा प्रधानमन्त्री प्रचण्डले अहिलेको मन्त्रिपरिषदमा रहेर काम गरिरहेका मन्त्रीहरुमा किरातीको नतिजा उत्कृष्ट रहेको बताएका थिए ।
मन्त्री किरातीले एक्सनमा काम गरिरहेका छन् । प्रायः घाटामा जाने गरेको नेपाल वायु सेवा निगमको आम्दानी किराती मन्त्री बनेपछि दोब्बरभन्दा बढिले वृद्धि भएको छ । त्यस्तै निगमको जहाज खरिद प्रक्रियालाई अगाडि बढाउने तयारीमा मन्त्री किराती छ । पर्यटनको विकास विना नेपाल र नेपाली जनताको समृद्धि सम्भव नरहेको मन्त्री किरातीको दाबी छ । नेपालमा पर्यटनको विकासका लागि निगमले सेवा विस्तार गर्न आवस्यक रहेको उनको भनाइ छ । सोही आवश्यकतालाई मध्यनजर गरेर जहाज खरिद पक्रिया अगाडि बढाउने तयारी भइरहेको छ ।
साथै, नेपालको उड्डयन क्षेत्रलाई युरोपीयन युनियनको कालोसूचीबाट हटाउन मन्त्री किरातीले पहल गरिरहेका छन् । केही समयमै नेपाली आकाश इयुको कालोसूचीबाट हट्ने मन्त्री किराती बताउँछन् । नेपाली आकाशलाई कालो सूचीमा राखिँदा त्यसको प्रत्यक्ष मार पर्टटन क्षेत्रमा समेत परेको मन्त्री किरातीको भनाइ छ । नेपाली आकाश सुरक्षित छ भन्ने मनोविज्ञान पर्यटकहरुमा विकास गराउन पनि नेपाली आकाश इयुको कालोसूचीबाट मुक्त हुन आवस्यक रहेको मन्त्री किरातीले बताउँदै आएका छन् ।
त्यस्तै, त्रिभुवन विमानस्थलको ब्यवस्थापकीय सुधारमा पनि मन्त्री किरातीले एक्सनमा काम गरेका थिए । विमानस्थलको संयन्त्रलाई चुस्तदुरुस्त बनाउन मन्त्री किरातीले बेला–बेलामा निरीक्षण र त्यसपछि मातहतका निकायलाई निर्देशन दिने गरेका छन् । जसका कारण पछिल्लो समय नक्कली कागजात बनाइ भिजिट भिसामा विदेश विदेश पठाउने मानव तस्करको गिरोह पक्राउ परेको थियो ।
पछिल्लो भेटमा प्रधानमन्त्री प्रचण्डले परिणाममुखी काम गरेको भन्दै मन्त्री किरातीको प्रसंशा गरेका थिए । साथै, प्रधानमन्त्री प्रचण्डले प्रतिवद्धता जनाएअनुसार अझै राम्रा र परिणामुखी काम गर्न र मन्त्रालयसँग सम्बन्धित काम छिटो, छरितो र गुणस्तरीय बनाएर जनतामा सेवा प्रवाह गर्न निर्देशन दिएका छन् ।
