नाै दिन सम्म विना अक्सिजन समाधिमा बसेका बाबा

पोखराको रामघाटमा माटोमा पुरिएर भू-समाधीमा बसेका ‘सिद्धबाबा श्रीवैष्णव कृष्णदासजी महाराज’लाई नवौँ दिनको दिन सकुशल बाहिर निकालिएको छ ।

बाबलाई उनैले समाधीमा बस्नुअघि तोकेको समय अर्थात शुक्रबार बिहान ९ बजेर ३५ मिनेट जाँदा बाहिर निकालिएको हो । उनले समाधी पूरा हुने समयसिमाको २/३ मिनेटमात्रै पनि तलमाथि भए आफूलाई जे पनि हुनसक्ने भन्दै आयोजकलाई पहिले नै सचेत गराएका थिए ।

विनाअक्सिजन एउटा बाकसमा राखेर पुरिएका बाबा ९औं दिनको दिन सकुशल निस्किएपछि पोखराबासी अचम्ममा परेका छन् । उनको दर्शन गर्न र आशिर्वाद लिन अहिले हजारौंको भीड लागेको छ ।

चिकित्सकले सामान्य चेकजाँच गरेपछि उनी होसमा आएका थिए । सहयोगीले उनी सुतेको स्थानबाट उठाए । त्यसपछि दही खुवाइयो । केहीबेरपछि पानी पिए अनि शंख फुके । अनि उनी भक्तजनहरुलाई दर्शन दिन बाहिर निस्किएका थिए ।

विना अक्सिजन ९ दिनसम्म समाधिमा बसेका बाबा जीवितै निस्किएपछि चिकित्सकहरु पनि अचम्ममा परेका छन् । चिकित्सा विज्ञानले विनाअक्सिजन ३ मिनेटभन्दा बढी बाँच्न मानिसलाई निकै कठिन हुने पुष्टि गरिसकेको छ ।

यी बाबाले हरेक वर्ष चैते दसैं तथा बडादसैंमा विशेष समाधि साधना गर्दै आएका छन् । पहिलोपटक उनी २०६५ सालको रामनवमीमा सुनसरीको चतरामा भू-समाधिमा बसेका थिए । भारतको विभिन्न स्थानमा लामो समय तपस्या गरेपछि उनले निर्वाण प्राप्त गरेको बताइन्छ ।

कसरी सम्भव हुनसक्छ यस्तो ?

उनी चैत २६ गते विशेष पूजाआजा गरेपछि हावा नछिर्ने गरी बनाइएको काठको बाकसमा सुतेका थिए । त्यसपछि सो बाकसलाई बन्द गरियो । त्यसमा दायाँ-बायाँ ४ वटा ताल्चा लगाइयो । बाकस भित्र सेतो कपडा र बाहिर प्लाष्टिकले राम्रोसँग बेरियो । त्यसपछि बाकसलाई बालुवा मिसिएको माटोले २ फिट जति पुरिएको थियो । त्यसपछि जमरा छरिएको थियो ।

उनी समाधीमा बसेको आश्रमको झ्याल ढोका पनि हावासमेत पस्न नसक्ने गरी बन्द गरिएको थियो । ढोकामा ताल्चा साथै सो कोठा रहेको मूल गेटमा पनि ताल्चा लगाएर साँचोलाई विशेष निगरानीमा राखिएको थियो । त्यहाँको प्रबन्ध हेर्दा कुनै शंका गर्ने ठाउँसमेत नरहेको प्रत्यक्षदर्शीहरु बताउँछन् ।

साझा पोष्ट बाट