माओवादी एकीकरणपछि बन्यो नेकपा माओवादी केन्द्र पार्टी

एकीकृत नेकपा माओवादीसहित १० वटा माओवादी विचारधारा भएका पार्टीहरुवीच एकीकरण भएर पुष्पकमल दाहाल प्रचण्डको नेतृत्वमा नेकपा माओवादी केन्द्र नामक पार्टी निर्माण भएको छ । कम्युनिष्ट नेता कष्णदास श्रेष्ठको अध्यक्षतामा भएको एकता घोषणा सभामा एकताको घोषणा गरिएको हो ।
एकता प्रक्रियामा एमाओवादीसँगै नेकपा क्रान्तिकारी माओवादीबाट आएका रामबहादुर थापा बादलको समूह, विप्लव माओवादीबाट आएका तिलक परियारको समूह, मणि थापा नेतृत्वको क्रान्तिकारी कम्युनिष्ट, मातृका यादवको नेकपा (माओवादी) र जयपुरी घर्ती सहभागि थिए ।
बहुपदीयमा गएको माओवादी केन्द्रको उपाध्यक्षमा नारायणकाजी श्रेष्ठ ‘प्रकाश’, रामबहादुर थापा ‘बादल’ महासचिव, कृष्णबहादुर महरा उपमहासचिव रहेको बताईएको छ ।
एकीकृत पार्टीको महाधिवेशन एक वर्षभित्र हुने छ जसकोलागि ६ सय ९९ सदस्यीय महाधिवेशन आयोजक समिति बनाइएको छ ।
एकता घोषणा सभालाई सम्बोधन गर्दै प्रचण्डले माओवादीको विजय अभियान सुरु भएको र षडयन्त्रकारीहरुको हारको दिन सुरु भएको भन्दै जनयूद्धमा भएका घाईते अपाङ र शहीद परिवारको आशु पुछन एकता भएको दावी गरे । उनले माओवादीबाटै प्रधानमन्त्री बनेका डा. बाबुराम भट्टराई, मोहन बैद्य किरण र नेत्रविक्रम चन्द पनि एकता प्रक्रियामा आउने दावी गर्दै उनीहरुलाई आब्हान गरे ।
उनले गणतन्त्र, धर्मनिरपेक्षता, समानुपातिक समावेशी लगायतका परिवर्तनका एजेण्डाहरु पराजय हुने दिन सकिएको दावी गर्दै राजतन्त्र फर्काउने सपना देखेकाहरुको मृत्युको दिन सुरु भएको बताए ।
प्रचण्डले एकता वृहत शान्ति सम्झौता अनुसार सत्य निरुपणको काम गर्ने सुनिश्चित भएको दावी गर्दै यो वर्षको अन्त्यसम्म पार्टीको महाधिवेशन गर्ने र कार्यदिशालाई विकसित गर्दै जाने बताए ।